Donkam ka jingïatrei lang baroh ki District Council ban ïoh ïa ka Sixth Schedule kaba paka

Shillong, Naiwieng 20 : U CEM barim ka KHADC bad Nongïalam ka Liang Pyrshah, Bah Titos W Chyne ha ka sngi Palei u la banjur ïa ka jingdonkam ban don ka jingiatylli lang kawei hapdeng baroh ki district council na ka bynta ban ïoh ïa ka Khyrnit kaba Hynriew kaba pura bad kaba paka.
Ïa kane u Bah Titos u la kren ha ka National Seminar kaba la pynlong da ka All Bodo Students Union (ABSU) ha Nongbah New Delhi. Ha kajuh ka por u la pynpaw pat ka jingbynniaw halor ka jingpynslem jong ka sorkar pdeng ban pyntreikam ïa ki jingkular kiba u Myntri Kampohiing ka Ri u kular shisnem mynshwa.
“Ngi dang bteng haduh mynta ban buddien na ka bynta kane ka jingpynkylla thymmai ïa ka Khyrnit kaba Hynriew. Mynta la shisnem ka por ka la ïaid naduh ka jingïalang bad u Myntri Kampohiing ka Ri ha kabala kdew ban don ïa ka Special Committee bad kumjuh ka jingkular kaba la ai ha ki nongïalam jong ki District Council ba yn sa khot biang ïa ki ban ïatai ha ki por ban sa wan. Kata ka jingkular ka la wanrah jingkyrmen ïa ki Council jong ngi. Hynrei ka jingbym don ki jingmih kiba lah ban ïohi ka la pynmih ïa ka jingsngewkhia bad jingsngewsih. Dei na kane ka daw ba ka jingïalang mynta ka sngi ha Delhi ka kit ïa ka jingmut na ka bynta jong ngi baroh. Ka phah ïa ka khubor ba ki Council jong ka thain shatei lammihngi ki dang ïatylli halor ki jingdawa,” u la ong.
Shuh shuh u bynrap ruh ba ka Khasi Hills Autonomous District Council ka ieng ryngkat bad ki jingdawa ba la pynpaw ha katei ka jingïalang.”
Ha kane ka seminar la wan ban shim bynta lang da ki nongïalam jong ki council na kylleng, nangta ki riewshemphang halor ka Riti Synshar, ki nongmihkhmat paidbah bad ki seng bapher bapher na kylleng ka thain shatei lam-mihngi jongka Ri kiba da kawei ka sur ki buh ruh ïa ka jingkyrpad ha ka sorkar pdeng ha shwa ka Dorbar Tlang jong ka Parliament.