Shillong, June 23 : U Myntri tnad Bording u Abu Taher Mondal hynne ka sngi Thohdieng ula ong ba ka jylla Meghalaya kaba mad ïa ka jingeh ha ka jingpynmih ïa ka bording lyngba ka um, ka la dei ka por ba kan wad ïa ki lad ki lynti da kawei pat ka rukom pynmih ïa ka bording haba phaikhmat sha ki Renewable Energy ne ka tan bording na ka Lyer bad ka Sngi.
U AT Mondal ula kren ïa katei ha ka seminar kaba la pynlong da ka Centre for Science and Environment (CSE) bad Association of Renewable Energy Agencies of States (AREAS), hapoh ka Ministry of New and Renewable Energy (MNRE).
Ula ong, ba nalor ka jingpynmih ïa ka bording na ka um ka dei ruh da kaba pynmih ïa ka bording lyngba ka Renewable Energy ïa kaba ka sorkar ka dang phaikhmat bha mynta.
Haba kren halor ka mat ha kaba ïadei bad ka jingrem dor jong ka Renewable Energy, u Mondal ula ong, ba kan dei ka jing shimkhia jong ka sorkar ban pynïasoh da ka Renewable Energy sha ki kam bapher bapher bad kumjuh ruh ki tnad Sorkar.
Ula ong ba kane kadei ka lad ïa ka jylla Meghalaya, kaba ïakhun ïa ka jingtynjuh jong ka jingduna ka bording, kaba ka sorkar ka ïaleh ban kyntiew khnang ba ki jaka ha nongkyndong ruh kin lah ban ïoh ïa ka bording bad ka sorkar kala shimkhia ruh ban pynpoi ïa ka bording ka ban long kaba lah kot bor ban siew da ki riewpaidbah.
U Mondal ula ai khublei ruh ïa ka Ministry kaba la pynlong ïa kane ka seminar ha kane ka thaiñ namar ka long ka kabu kaba biang bha ïa ka jylla bad ïa ka thaiñ ban shim kabu ïa kiwei pat ki lad lyngba ka New & Renewable Energy khnang ba yn lah ban pyndap ïa ka jingduna ka bording ha ka jylla.
Ka jingthmu jong kane ka Seminar ka long ban wad shuh shuh ïa ki lad bad ban sngewthuh ïa ka jingkot bor ki jylla haka thaiñ shatei lam mihngi ban ïoh ïa ka bording kaba khuid.
Ha kane ka seminar la wan ban ïashim bynta da ki tnad sorkar bapher kaba kynthup ruh ïa ka Centre for Science and Environment (CSE), Association of Renewable Energy Agencies of States (AREAS), IIT Guwahati bad North East Centre for Technology Application and Reach (NECTAR).
