Donkam bha ban ai ki jinghikai ïa ki samla ha kaba ïadei bad ka jingroi jong u drok: Camelia
Shillong, Nailar 31: Wat la ka jylla Meghalaya kam pat ïoh ïa ka kaiphod kaba biang ha kaba ïadei bad ka jingpyndonkam bakla kaba jur bha ïa u drok lyngba ka Dark Web, hynrei ka sorkar jylla ka shim ba kane ka dei ka kam kaba donkam ban shimkhia bha ban pynsngewthuh ïa ki nonghikai, ki kmie ki kpa bad ki nongshong shnong kumno ba kin sumar ha kaba ïadei bad kane ka bynta.
Ha kaba ïadei bad kane na ka liang ka tnat Social Welfare da ka jingkyrshan ka Ministry of Social Justice & Empowerment kaba hapoh ka National Action Plan for Drug Demand Reduction (NAPDDR), dang shen ka la pynlong ïa ka workshop kaba shi sngi halor ka phang, “Digital Dangers: How Cyber Crime Fuels Drug Abuse”.
Ïa kane ka prorkam la pynlong hapdeng ka jingïatreilang bad ka Drug Reduction, Elimination & Action Mission (DREAM), Meghalaya Police (Cyber Crime Division), Dreamzware Software Solutions, Hyderabad bad ka Kripa Foundation.
“Ha kane ka sngi ngi la wanrah ïa ki samla kumno ba kin tip shaphang u drok ym ha ki surok hynrei lyngba ki lad digital kum ha ki social media, online gaming networks, messaging platforms, bad wat ha ki encrypted apps-kiba don ki jingïadei bad kine ki jingpyndonkam bakla ïa ki jingdih pynbuaid. Kine ki kam online la bunsien la lap ba ki la pynsaphriang ïa ka jingpyndonkam ïa u drok, ki pynsaphriang ïa ki jingtip kiba bakla bad kiwei kiwei, lada la ieh khlem da phikir kan wanrah ka jingma ïa ka imlang sahlang,” ong ka kyrwoh na ka DREAM.
Na ka liang ka Social Welfare Director bad ka Additional Mission Director ka DREAM Camelia Doreen Lyngwa ka la pynpaw ïa ka jingangnud jong ka sorkar ban wanrah ki kam ki ban tei ïa ka bha ka miat ïa kito kiba la mad ïa kane ka jingeh na ka jingshah teh shah khum ha u drok ba kin wan ban kylla bad ban imbiang hapoh ka imlang sahlang kaba biang.
Ka la banjur ïa ka jingdonkam ka jingïatreilang hapdeng ki nongshong shnong naba kane ka jingïakhun pyrshah ïa u drok kam dei ka kam kaba marwei ne jong ka sorkar hynrei kadei kaba donkam lang jong baroh. Ka la ong ba wat la ha ki por kiba mynshwa kam pat ju don kane ka jingïakren hynrei mynta donkam ban pynsngewthuh bha ïa ki samla ha kane ka juk kaba mynta.