Nongstoiñ, Nailar 27: Ka St Francis D’Asisi Collge kaba don ha ka shnong Siejlieh West Khasi Hills, ka dei kawei na ki jaka pule kaba la kiew bha ha ka jingdon jong ki khynnah bad ka la pynmuh ruh shibun ki samla kiba la pyndep ïa ka jingpule ha ki kyrdan ba kham sha jrong.
Ha une u snem ki la don kumba sanphew ngut ki samla pule jong katei ka College kiba la pyndep ïa ka graduation kaba la pynbna da ka skul bah North Eastern Hills University Shillong. Napdeng ki sanphew ngut ki samla pule, ka samla Ibanrihun Lyndoh Marshilong ka la ïoh rung ha ka top ten ha ka risol kaba la pynbna da ka NEHU.
Kumta kum ba ju leh man la u snem ka college ka la pynlong ïa ka jinglehkmen mynta ka sngi kum ka Graduation Day, da kaba khot lang ïa ki kmie ki kpa jong ki samla pule bad kum ka jingpynsah jingkynmaw ïa ka jingpoi jong ka samla Ibanrihun Lyngdoh Marshillong ha ka kyrdan kaba ha khmat eh ka pynlong ruh ïa ka jingpynkup burom ïa katei ka samla bad ki sawphew khyndai ngut kiwei pat.
Shuwa ban pynkup burom ïa ki samla la ïoh ïa ki prokarm ba kyrpang na ki samla kiba dang don ha ka jingpule kum ki jingrwai jingshad tynrai bad ki jingshad ba bun jait. Hadien kata la ïoh ïa ka jingpynkup burom nyngkong eh ïa ka samla Ibanrihun Lyngoh Marshilong bad kiwei pat da u bah Gabriel Wahlang MLA ka Nongstoiñ u ba long u kongsan.
U bah Wahlang haba kren kum u kongsan, u la ong ba ki samla haba ki la pyndep ïa ka jingpule, ki dei ban don ïa ka thong ha ka jingim jong ki bad kim dei ban duh jingkyrmen, namar ki don shibun bah ki lad ki lynti ban kyntiew ïa ka lawei jong ki.
U la ong ruh ba ym lah ban len ba kane ka dei ka juk kaba nadong sha dong ki la kylla lut naduh ki jingmut jingpyrkhat, ka trei ka ktah bad nadong shadong. Hynrei ki samla ki dei ban kynmaw ba ki hap ban ïaleh katba lah ban pynskhem ïa ka jingmut jingpyrkhat jong ki bad ban beh sha ka thong kaba bha ban tei ïa ka lawei ka jong ki.
