Nongpoh, Jylliew, 08: Haba kren haka prokram ai jinghikai bad ban ai mynsiem ïa ki khun samla ban tip shano ban jam hadien ki jingpule bapher bapher (Career Guidance), u MP ka Shillong u Dr Ricky AJ Syngkon u la ong ba ka long kaba donkam ïa ki khun samla ban siewspah ïa ka por ban poi shaka thong haka jingim, namar ki briew hi ki bym nang ban tyngkai ïa ka por kin duh noh shibun kiei kiei haka jingim jong ki.
Ïa katei ka prokram ai jinghikai la pynlong da ka Seng Samla & Cultural Sports Club, Syadrit ryngkat ka jingïatrei lang bad ka University of Science & Technology Meghalaya (USTM) ba la pynlong ha CFC Balawan Hall, Umsning da ka thong ban btin lynti ïa ki khun samla shano ban jam hadien ki jingpule bapher bapher, ba kin tip kaei ban jied haka jingim jong ki.
Lyngba katei ka prokram kan long ruh kum ka jingkieng ïa ki khun samla khamtam kiba wan na ki thaiñ ba kham kyndong bad ki bym don satia kiba btin lynti ïa ki, namar ki don shibun ki lad bad ki kabu ïa ki khun samla ban bteng ïa ki jingpule jong ki ba kham shalor namar ha katei ka sngi ki samla ki ioh ruh ban ïakren markhmat ban buh ruh ki jingkylli bad ban weng ïa ka jingbymshai jong ki haka liang ka pule ka puthi bad katei ka prokram ka la long shisha ka jingkyrkhu ïa ki khun samla ha katei ka thaiñ.
Ha katei ka sngi la sakhi ruh da ka jingdonlang u Dr Celestine Lyngdoh MLA ka Umsning, Bah Banrikus Nongsteng MDC ka Umsning, u Mahbubul Hoque Chancellor ka skulbah USTM, ki nongïalam ka seng Samla bad kiwei kiwei ki riew rangbah ryngkat ki samla pule.
