K i surok ki dei u budlum jong ka kit ka bah, ka leit ka wan bad ka khaïi pateng ha kane ka jylla Meghalaya namar lait na ki surok, lada phai sha ki liengsuiñ ruh dang duna palat dang tang kawei ne ar tylli kiba wan hiar shisngi ha ka Kad Liengsuiñ Shillong kaba ha Umroi bad lada phai sha ka Rel ruh ym don satia namar ka jingpyrshah jong ki seng bhalang ban wanrah ïa ka lynti rel katba ym pat pyntreikam ïa ki aiñ ba pyrkhing ban ïada na ka jingwan tuid kiwei ki jaidbynriew ne mynder sha kane ka jylla Meghalaya ba ieit jong ngi.
Ym lah ban len kane ka sorkar MDA ka la pyrshang katba lah ban pynbha ïa ki surok ha kylleng ka jylla khamtam ki surok bah jongka jylla bad wat ki National High Way ruh. Ka jingshna ïaka surok fourlane naduh Umshyrpi shaduh hynniew mer ym lah ban len ka la ïaid shaid shaid bad kane ka dei ka surok ban pynïasoh ïa ka two lane pat shaduh Dawki. Lada phai sha ka rukom shna ïa kane ka surok ki don ki bynta ba ka jingtrei ka sted bha bad ki don pat kiba suki palat. Kane ka jingsuki ka la pynlong ïa ki heh sorkar ban khot ïa ki heh ka NHIDCL na ka por sha ka por ban ïakren ban pynsted ïa ka jingtreikam.
Hooid kumba long mynta da kane ka jingsuki ha ki katto katne ki bynta ka la ktah da shisha ïa ka ïaid ka ïeng ki paidbah namar teng teng ki sahkut da ki kynta tang naduh Upper Shillong ban poi sha Shillong bad wat kiba leit phai sha la ki shnong ki thaw hadien ba la pyndep kam ha Shillong ruh. Kane ka jingjur ka jingdheng kali ha katei ka thaiñ Upper Shillong namar ba kane ka jingshna ïa ka surok ka dang ïaid ka ktah ym tang ïa katei ka thaiñ hynrei ka ktah lut ïa baroh kawei ka sor Shillong khamtam lei lei ha ka Lah Sngi U Blei bad ha ka Sngi Thohdieng. Ka daw bah ka dei ba lait na katei ka surok ym don kiwei pat ki surok kiba pynïasoh na katei ka thaiñ sha ka nongbah Shillong. Hooid ka sorkar ka la wad ki lad ki lynti ban pynbun ïaki surok bye pass ban pynïasoh ïa ka nongbah Shillong khnang ba ki kali ba wan na ki thaiñ West Khasi Hills, South West Khasi Hills bad kumjuh ruh Eastern West Khasi Hills District kin ïoh ban ïaid na kiwei pat ki surok haba wan sha kane ka nongbah Shillong. Ym tang katta wat ïa kiba wan na ki thaiñ Smit, Jowai bad kiwei kiwei ki jaka ruh donkam ban don ki surok ki ban pynïasoh sha ka nongbah Shillong. Ka daw bah ba jur ka jingdheng kali ka long ba ki don tang kitei ki ar tylli ki surok bah kiba pynïasoh ïa kane ka nongbah.
Ym lah ban len naduh ba kane ka sorkar ka la shimti ïa ka jingsynshar ki la nang bun ki surok kiba la nang pynbha bad pynheh kum ka surok naduh NEIGRIHMS shaduh dieng pasoh kaba pynïasoh shaduh ka surok Shillong bye Pass ruh. Ka jingdon kane ka surok ka la ïarap bha ïa ki briew kiba leit sha ki thaiñ Jaintia Hills ne sha kiwei kiwei ki jaka ban ïoh ïaid noh na katei ka surok. Ki dang don bun ki surok kiba kane ka sorkar ka dang shna mynta bad la kyrmen skhem ba tang shu dep kitei ki surok ka jingdheng kali kan kham duna khamtam lei lei ba ka jingtei ia ka Nongbah Shillong ba thymmai ruh ka la nang ïaid shaid shaid kumta suki pa suki ka jingkyrmen ka long ba ki paidbah kin lait noh na kine ki jingeh jongka jingdheng kali. Namar lada ym don bun ki surok khlem pep hadien katto katne snem kam myntoi shuh ban dang ïa sei kali na la ïing namar tang shu mih na phyllaw sbak la sahkut ka leit ka wan.
Kumta ka jingkyrpad ïa ka sorkar ka long ban bthah ïa ki kompani kiba shim ban trei ïa ki surok ha kane ka jylla ba kin pynsted ka jingtrei jongki khnang ba kan ym ktah jur than ïa ki paidbah. Namar lada phai sha kiwei kiwei ki jylla haba ki kompani ki shna surok ki trei miet la bad sngi hynrei ha kane ka jylla la ïohi ba ki mashin bad ki briew ki kham trei tang mynsngi katba mynmiet pat ki thiah. Donkam ba ka sorkar kan bthah ba kin trei kumba ki trei sha kiwei ki jylla khnang ban dep kloi ka kam.
