Shillong, Risaw 6 : U Myntri sorkar ba thymmai bad MLA jongka Jirang Constituency u bah Sosthenes Sohtun u la banjur ïa ka jingdonkam ban pynsted ka jingïapynbeit pud hapdeng ka Meghalaya bad Assam ha ka Wat kaba Ar ban pyndep noh kloi iïa kane ka kam ba sahteng la bun bun snem.
Related Posts
U Bah Sohtun uba dei ruh u dkhot jongka Regional Committee u la ïathuh ïa ki nongthoh khubor ba ka jingïakren ka dang ïaid shakhmat ban pynsted ïa kane ka kam khnang ban lait noh na kino kino ki jingartatien bad sngewkhohñioh na ki paid khappud bad ruh ban don noh ka jingïashong suk shongsaiñ. “ Ngi don ha ka Wat ba Ar jongka jingïakren. Ngi la ïamir jingmut bad u Chairman ka Regional Committee khnang ba ngin lah ban pynsted ïa kane ka jingïapynbeit pud na ka bynta kito ki jaka ba dang sahteng bad lada lah ban pyndep kloi kan ïarap ïa ki paid khappud ban lait na kino kino ki jingsngewkhohñioh bad jingartatien. Namar ki briew kiba sah ha khappud ki kwah ban ïoh noh ïa ka shongsuk shongsaiñ kaba ïai neh junom” ong u bah Sohtun.
Kane ka kam ia pynbeit pud ka Meghalaya bad Assam ka dei ka kam ba la sahteng da ki phew phew snem mynta bad ki don haduh 12 tylli ki jaka ba ïa kajia. Dei ha u Lber 2022 ba ki ar jylla ki la ïasoi ïa ka soskular ne ka Memorandum of Understanding ban ïa pynbeit noh ïa kine ki jaka ba don hapdeng ka jingïakajia. Hynriew tylli ki jaka la dep ïa pynbeit bad kiba sah mynta ki don sa hynriew tylli. Kine ki hynriew tylli ki kynthup ka Langpih, Borduar, Deshdoomreah, Block I-II, Psiar-Khanduli, bad Nongwah-Mawtamur. Dang ha u bnai Jylliew u Myntri Rangbah ka jylla u Conrad K Sangma bad u Myntri Rangbah ka Assam u Himanta Biswa Sarma ki dang ïakren ban ïa pynbeit noh ïa kine ki jaka ba sahteng.