Shillong, Naiwieng 10: U Lat ka jylla u CH Vijayashankar u la ong ba ka Meghalaya ka dei ka jylla kaba dap da ki jingriewspah jong ka mariang bad ki riti dustur kumta donkam ban pynneh pynsah ïa kane na ka bynta jong ki pateng ban wan.
Ïa kane u la ong ha ka jingplie ïa ka 4th Annual International Conference of the Society for Pathways to Sustainability (PathS) kaba la long ha Raj Bhavan, ha kaba u la banjur ïa ka jingdonkam ban burom ïa ki riti dustur kiba don ha kane ka jylla.
U la ong ba kane ka mynsiem ka dei kaba la don ruh naduh hyndai hynthai ha India.
Na ka liang u Lat ka jylla u la pynpaw ïa ka jingsngewkhia halor ka jingkiew jong ki kam karkhana, watla ki wanrah ïa ki kam pynroi hynrei ki ktah ruh ïa ka bor mariang.
Na ka liang u Lat u la ai khublei ïa ka NEHU bad baroh ki jaka pule kiba la jied ïa ka Meghalaya ban pynlong ïa kane ka jingïalang.
Kane ka jingïalang kaba ar sngi la pynlong halor ka phang “Sustainable Development: Theory, Practice, Approach and Policy” ba la pynlong lang da ka Department of Economics, North Eastern Hill University (NEHU), Shillong; Society for Pathways to Sustainability (PathS); OKDISCD, Guwahati; AAS bad ICSSR-NERC.
La don palat 100 ngut ki nongthoh wadbniah kiba la shim bynta ha kane ka jingïalang.
