Shillong, Nailur 17: Ka Myntri ka Koit ka Khiah ka kong Ampareen Lyngdoh ha ka sngi baar ka la pynpaw ïa ka jingdonkam ban kyntiew ïa ka jingmang khambun ïa ki post na ka bynta ki doktor bad ki nurse ha ka jylla.
Haba ïadei bad kane haba ïakren bad ki nongthoh khubor, ka Myntri ka la ong “Ngi la ïakren man ka por bad u Myntri Rangbah ka Jylla bad ruh ïa ka Tnat Finance bad Planning ban pynthikna ba ngin nang pynbun ïa ka jingmang ïa ki kam na ka bynta ki doktor bad ki nos”.
“Kane ka dei namar ka rukom treikam bad ka la dawa kham bun hynrei ka jingmang thungkam pat kam don,” ka la ong da kaba bynrap, “Ka jingmang ïa ki kam doktor kam shym la kylla la bun phew snem naduh u 1972 kumjuh ruh ka jingdon ki nos hynrei mynta ki jaka sumar kila nang bun bad ngi la don haduh ki kyrdan sub-centre”.
Na ka liang ka Myntri ka la ong ba ka Jylla ka la mad ïa ka jingeh ha ka jingduna jong ki doktor specialist palat ban ïa ki medical officer.
“Ki doktor specialist haba ki leit pule specialist, kin hap ban ïasoi ïa ka jingïateh ne ka bond bad ki Jylla kiba tyrwa ïa ka jingpule. Ki don kum kine ki jingeh, ngi hap ban pyrshang ban wad ïa ki lynti kumno ba ngin leh bad kaei kaba ngin ïasaid bad ka Sorkar India,” ka la bynrap.
