Donkam ban kyntiew ïa ka Red Cross Hospital sha ka kyrdan kaba kham shalor, ong u Bah Sanbor

Shillong, Rymphang 13: Ki nongmihkhmat ka BJP Meghalaya hapoh ka jingïalam jong u MLA ka BJP u Bah Sanbor Shullai bad u State President Rikman Momin dangshen ki la kynduh ïa u Myntri ka sorkar pdeng uba khmih ïa ka tnat Minority Affairs u Kiren Rijiju da ka jingthmu ban kyntiew kyrdan ïa ka Red Cross Hospital, Laban da kaba pynthymmai noh ïa ka jingtei kaba don mynta ka Assam type da ka jingtei kaba thymmai bad ki jingdon ki tiar ki tar kiba thymmai katkum ka juk kaba mynta.
U Bah Sanbor Shullai u la ong ba ka Red Cross Hospital kaba dang hab hapoh ka South Shillong constituency ka donkam ban kyntiew kyrdan khnang ba kiba duk ba kyrduh kiba don da ki hajar ngut kin lah ban bteng bha ïoh ki lad jingïarap ha kaba ïadei bad ki lad sumar sukher katkum ka juk kaba mynta.
U la ong ruh ba kane ka hospital kaba u la kha kadei ban long kaba bha tam khamtam na ka bynta ki longkmie kiba wankha khun ha kane ka hospital kaba ha Shillong.
U MLA shuh shuh u la ong ba ha kane ka jingïasyllok, u Myntri ka sorkar pdeng u la pyni ïa ka jingkwah jong u ban kyntiew ïa kane ka hospital da kaba khmih ruh ïa ka detailed project report kaba la aiti sha ka department of Minority Affairs bad ïa kane un sa peit hadien jong ka election.
Halor kane ki nongmihkhmat ka BJP kin sa kynduh ruh shen ïa u Myntri Rangbah ka jylla u Conrad Sangma bad ban kyrpad ïa u ban phah ka jingtyrwa sha ka tnat Minority Affairs kham kloi bad kumjuh ruh ban buh hakhmat shwa ïa kane ka kam kaba donkam.
U Bah Shullai u la ong ba u la buh eh hakhmat ban pynlong ïa ka jingangnud jong ki paidbah ban pynïoh ïa kane ka hospital ha ka por ba u dang long kum u nongmihkhmat.
U MLA ka BJP u la banjur ba dei ban trei khambun bad dei ban kren duna kaba dei ka kam saiñ pyrthei ka jong u.