Donkam ban khot da ki Scientist ba kin tohkit ïa ka jingbam khniang u kwai bad u kba : Timothy

By Mawphor Editor On Oct 22, 2025

Shillong, Risaw, 21: U Myntri ka rep ka riang ka Sorkar Jylla u Timothy D Shira u la ai jingmut ba la donkam ban khot da ki Scientists ba kin pynlong ïa ka jingtohkit kaba bniah bad ban wad ïa ki lad ki lynti kumno ban ïada ïa ka jingbam khñiang u jyntang kba bad u kwai ha ka jylla.
“Ngi hap ban khot da ki Scientist ki ban tohkit bniah bin pa bin bad ban wad ïa ka daw tynrai khnang ban weng ïa kane ka jingeh,” la ong u Shira ha ka jingïakren bad ki lad pathai khubor ha ka sngi Baar.
U Myntri u la ong ba ka jingbam khñiang u kwai ka la pynduhnong bha bad ki nongrep ki mad ïa ka jingduhnong haduh T.20 lak shi 100 byrni.
U Shira u la batai ba na kawei ka bri kwai, ki nongrep ki khmih lynti ban ïoh pynmih 500 byrni u kwai. Hynrei da ka jingwan lynshop ki khñiang, ka jingrep kwai ka la shah ktah haduh katta katta, kaba lam ruh sha ka jingduhnong kaba jur bha.
U Myntri u la ong ba ki ophisar na ka tnat ka rep ka riang kin ym lah satia ban tip kham bniah kumno ban ïakhun pyrshah ïa ka jingshah bam khñiang u kwai.
U la pynkynmaw ruh ba donkam ban leh kumjuh ha ka jingrep kba, ha kaba ki khñiang ki ju pynjulor ïa u kba ha lyngkha.
U Myntri u la banjur ba donkam ban ai jinghikai pyntbit ïa ki nongrep katkum ka juk stad saïan ha ka rep ka riang. U la ai nuksa na rilum Khasi, ha kaba ki nongrep kiba la ïoh jinghikai mynta ki ïoh nong bha namarba ki lah ban pynmih kham bun ki mar rep.
U la banjur ruh ba la donkam ban ai jinghikai wat sha rilum Garo khamtam ha kaba rep khlem dawa bad ban shu pyndonkam beit tang da ka sboh eit masi.
Namarba ki nongshong shnong ha ka jylla Meghalaya, kumba 75% ki dei kiba dang shaniah ha ka rep ka riang, u Shira u la ong ba la donkam ruh ban ïada ïa ka kamai kajih jong ki nongrep.
U la kdew ruh ïa ka jingmyntoi na kaba rep khlem dawai chemical bad ïa kaba pyndonkam beit da ka sboh eit masi kaba lah ban pynsboh bha ïa ka khyndew bad ka khyndew ka pynmih ruh ïa ki jhur ne ki mar rep kiba ai ka jingkoit jingkhiah.