Donkam ban ïatreilang ka Meghalaya bad Assam ban pynduna ka jingjaboh ka lyier: Sosthenes Sohtun

Shillong, Risaw 06: U Myntri ba khmih ïa ka tnat Community & Rural Development (C&RD) u Bah Sosthenes Sohtun u la khot ïa ka jingdonkam ban ïatreilang hapdeng ka jylla Meghalaya bad Assam khnang ban lah pynbeit ïa ka jingeh kaba mih na ka jingpynjaboh ïa ka lyier.
U Bah Sohtun haba ïakren bad ki lad pathai khubor ha ka sngi Nyngkong u la ong ba ula pynpaw ïa ki jingsngewkhia shaphang kane ka jingpynjaboh ïa ka lyier kaba mih na ki karkhana kiba don ha Byrnihat na ka por sha ka por.
Haba pynpaw ba bun na ki karkhana ki la dep shah khanglut, u la banjur halor ka jingdonkam ka jingïapyrshang lang hapdeng ka jylla Meghalaya bad Assam ban pynbeit ïa kane ka jingeh.
“Ka jingjaboh kaba mih kam dei tang na Meghalaya. Ngi don ïa ki pud ki sam kiba ïasohlang hapdeng ka Assam bad Meghalaya. Kumta ngim lah ban ong ba ka jingjaboh kaba mih ka dei tang na Meghalaya,” ong u Bah Sohtun da kaba pynpaw ruh ïa ka jinglong kyllaiñ ne ka jingsoh kyrdot jong kane kam.
U Bah Sohtun u la banjur ïa ka jingdonkam ka jingïajurip lang hapdeng kine ki artylli ki jylla ban wanrah ki jingpyrkhat kam kiba shai ban pynduna ïa kane ka jingpynmih jaboh.
“Tang lada ka wan ka jingïajurip lang hapdeng ka Meghalaya bad Assam kaba don ruh bad ki jingthmu ban pynduna ïa kane ka jingjaboh kumta kan long kaba eh ban pynbeit ïa kane ka kam lada ngim lah ban shimkhia lang ïa kane ka kam,” u la bynrap.
Na ka liang u Myntri u la pynthikna ba ka Meghalaya State Pollution Control Board (MSPCB) ka la shim ïa ka kam kaba tyngeh ïa ki karkhana kiba pynmih bun ka jingjaboh ne ka lyier jaboh.
Ka Byrnihat ka la mad ïa ka jingeh na ka daw jong ka jingjaboh palat ka lyier, ha kaba kane ka sor ka la poi ha ka kyrdan kaba nyngkong eh kum kawei na ki nongbah ba jaboh tam ka lyier kaba la buh kyrdan ruh da ka IQAir.
Ka sorkar jylla ka la shim ki sienjam ban pynbeit bad khmih ïa kane ka kam, ba kynthup ïa ka jingkhang khyrdep noh ïa ki karkhana kiba la pynkheiñ ïa ki kyndon bad kaba la shaiñ kuna ruh halor ka jingpynjulor ïa ka sawdong sawkun ïa kito ki karkhana ki bym bud ïa ki kyndon.
Ha kajuh ka por u Bah Sohtun u la pynpaw ruh ïa ki kam kiba hakhmat jong u kum u Myntri ka tnat C&RD da kaba banjur ïa ka jingdonkam ka rukom pynïaid kam kaba beit ka ban pynïasoh bad ki paidbah, khamtam sha ki thaiñ nongkyndong.
Ha kawei pat ka liang u la ong ruh ba ka rai mano u ban don hapoh ka Kynhun Myntri ka dei ka kam jong u Myntri Rangbah u Conrad K Sangma.