Nongstoiñ, Jylliew, 27: Ka seng Hynñiewtrep Youths Council Mawshynrut Circle ha ka sngi saitjaiñ, ka la ïoh ban pynïar ïa la u tnum u tyndai da ka ba ka la pynkha sa kawei ka shnat treikam jong ka, kata ïa ka HYC Nongsleh Area unit. Ha kane ka Unit ki don kumba 30 ngut ei ei ki dkhot ba kynthup naduh ki nongïalam ba ha khmat bad ki dkhot.
La pynlong ïa ka jingïalang hapoh ka Dorbar Hall jong ka shnong Nongsleh bad la pynïaid ïa ka jingïalang da u samla Ardonal Marbaniang Assistant GS HYC Mawshynrut Circle. La ïadonlang u Sordar Shnong u Rangbah Phridian Wanniang, u ba la ai ruh ki symboh jingkren da ka kyntu kynpham ïa ki nongkitkam, ba ki dei ban don ka mynsiem ïatreilang bad ka shnong ka thaw. U la pynpaw ruh ka jingsngewhun ïa ka jingmih ki samla kiba trei na ka bynta ka imlang sahlang hapoh ka shnong.
La ïoh ruh ka jingkren lamphrang ïa riti treikam jong ka Seng da u Samla Redyfernandy Sun In-charge jong ka HYC Mawshynrut Circle, da ka ba ong ba ka jingmih pyrthei jong ka seng ka dei halor ka jingdawa ban pyntreikam ïa ka ILP hapoh ka jylla bad kiwei dei ki mat jingdawa.
U Samla Banteilang Hoojon General Secretary HYC Mawshynrut Circle u la pynkynmaw ïa shibun ki lynti ïaid jong ka seng hapoh ka Mawshynrut kumjuh ha ka Bri u Hynñiewtrep hi baroh kawei. U President jong ka HYC Mawshynrut Circle u Samla Lostbingnel Lyngkhoi u la sneng kyntu ïa ki dkhot bad nongïalam ba wan ïasoh thymmai, ba kin trei shitom na ka bynta ban ïarap ïa ki nongïalam shnong ha ki ba bun ki liang.
Kiwei kiwei kiba la ai jingkren ki long u President ka HYC Maweit Circle u samla Jerimiïa Dkhar. La ïoh ban pyntiansmai ïa ki Nongïalam jong ka HYC Nongsleh Area unit da u Samla Wanteibok Lyngdoh General Secretary HYC WKHD. Haba ai jingkren, u la ong ba ka thaiñ Nongsleh ym lah ban len bun na ki nongshong shnong ki im ja ha ka rep ka riang. Kumta ka seng bad khamtam ki nongïalam ki dei ban dawa na ka Sorkar ban theh bun ki jingïarap, ban pynheh ïa ki kam rep kumjuh ruh ha ki kam ri jingri, khnang ba kan long ka jingmyntoi ïa ki paidbah.
