Donkam ban ïasoi ïa ka FTA hapdeng ka Thailand bad baroh ki jylla NE : CM

Shillong, Naitung, 30: U Myntri Rangbah ka Jylla u Conrad Kongkal Sangma ha ka sngi Saitjaiñ u la khot sngewbha ïa u Deputy Prime Minister jongka Thailand u HE Jurin Laksanawisit ban wan ïuhkjat sha kine ki jylla shatei lam mihngi ka ri India bad kumjuh ruh sha Meghalaya ban pynkhlaiñ ïa ka jingïadei ha ka khaïi pateng bad kam jngoh kai hapdeng ka Bangkok bad kiwei kiwei ki ri ba shathie jong ka dewbah Asia (South East Asian Nation) namar ki khamjan bha sha Thainland ban sha ka Delhi ruh.
Haba kren ha ka North East Festival kaba ar kaba long ha Cantara Grand Hotel, Bangkok u la ong “ Ka jingïasoi ia ka Free Trade Agreement (FTA) kam dei tang bad ki san tylli ki jylla kiba kynthup ïa ka Assam hynrei ka dei ban long bad baroh ki jylla kane ka thaiñ shatei lam mihngi”.
“ Nga la ïohi ba ïa ka FTA yn ïasoi noh bad ki san tylli ki jylla kynthup ïaka Assam. Nga sngew ba kam dei ban long tang ïa ka Assam hynrei kiwei ki jylla kane ka thaiñ ruh nalor ba kam mut ba haba leit sha Assam mut la ïaid lyngba ïa baroh ki jylla kane ka thaiñ” ong u Myntri Rangbah.
Ïa kane ka tamasa kaba lai sngi kynthih yn sa pynkut da ki jingpyninam ïa ki kolshor, ki jingrwai tynrai, ki jingbam tynrai jong ka thaiñ Shatei Lammihngi ka ban sa long ha ka Sngi U Blei.
U la ong ba ka North East India bad ka South East Asian kin don ka jingïatreilang kaba jan ha ka kolshor bad ha ka jingkyntiew ïa ka ïoh ka kot haba peit ïa ka jingïasyriem jong kine ki ar tylli ki thaiñ.
“Ka jingïadei hapdeng ka India bad ka Thailand ka la long palat 2000 snem. Yn phai biang sha ka por jong u Syiem Ashoka ha ka spah snem kaba lai haba ïa ka niam Buddhism la pynsuhthied ha Thailand na India. Ka jingïadei hapdeng ka India bad ka Thailand ka la don naduh tynrai,” u la bynrap.
“Ka thaiñ Shatei Lammihngi ka kham jan bha bad ki ri ha South East Asia. Kane ka wanrah ïa ka jingïadei kaba jan khamtam ha ka jingpynher liengsuiñ,” u la ong.
Haba ïaroh ïa ka “Act East Policy” kaba long ka thong jong ka Sorkar Pdeng bad ki jylla ka thaiñ Shatei Lammihngi, u Conrad u la ong ba u Myntri Rangbahduh ka ri u Narendra Modi u la plie lad ïa ka thaiñ Shatei Lammihngi na ka bynta ban kyntiew ïa ka ïoh ka kot jong ki paidbah da kaba pun jingkieng suki pa suki khnang ban pynïajan bad ki ri kiba don ha ka bynta ba sha thie jong ka dewbah Asia.
“Nga ngeit skhem ba kane ka tamasa kan kham phaikhmat na ka bynta ka jingïadei hapdeng ki paidbah jong ka thaiñ Shatei Lammihngi bad ka Thailand,” u la ong.
U la ong ruh ba ka thaiñ Shatei Lammihngi ka la wanrah ïa ki polisi ki ban pynmyntoi ïa kine ki ar tylli ki thaiñ bad bynrap ruh ba ka jingangnud jong ka Thailand ban buh ïa ka mini FTA ha ki san tylli ki jylla hapoh ka ri India, kynthup ha Assam kan sa nang pynïajan shuh shuh ïa ka jingïadei ha ka khaïi ka pateng.
“Dang shen ka Myntri Pla Tyngka ka Sorkar Pdeng ka la pynbna ba ka Sorkar India kan pyntreikam ïa ka surok Rel, ka surok, bad ka jingpynher liengsuiñ kaba kot haduh USD 17.19 billion ha ka thaiñ Shatei Lammihngi. Ïa ka Act East Policy jong ka Sorkar India la shim kylliang ruh da kaThailand kaba la pyntreikam ïa ka Act West Policy ban wanrah ïa ka jingïadei kaba jan hapdeng kine ki ar tylli ki ri,” u la bynrap.
U Myntri Rangbah u la ban jur da kaba ong “ Nga kyrpad ïa u myntri khynnah kam bar ri ka India u R.K Ranjan bad ka nonglam ktien ka India sha Thailand ka Suchitra Durai ba kin shim khia ban wan ïalam ïa u Deputy Prime Minister ka Thailand sha ka thaiñ shatei lam mihngi ka ri India khnang ba ngin ïoh ban pynkhlaiñ shuh shuh ka jingïadei”.
U la ong shuh shuh “ Lada ngi leit sha Bangkok na Imphal da ka liengsuiñ kan shim por tang shikynta duna bad nga sngew ban kyntu ïa baroh ki myntri rangbah ki jylla kane ka thaiñ bad ki MP ba kin ïatrei lang ban pynkhlaiñ ka jingïadei bad jingïajan bad ka Thailand ha ka khaïi pateng bad ki kam jngohkai pyrthei.