Donkam ban bishar biang ïa ka Reservation Policy bad dawa jylla Khasi-Jaintia: HSPDP

Shillong, Naitung 05 : Ka Hill State People’s Democratic Party (HSPDP) ha ka sngi Ba-ar ka la ong ba ki i donkam ban bishar bniah biang ïa ka Reservation Policy lane ka bhah thungkam thungjam jong ka jylla bad ong ruh ba ïa katei ka jingeh lah ban weng tang lada urlong noh ka jingdawa Khasi – Jaiñtia State.
Haba kren bad ki lad pathai khubor hadien ka jingïalang jong ka central executive committee (CEC), u President ka HSPDP, Bah KP Pangniang, u la ong ba ki dkhot jong ka party ki la pynpaw ka jingsngewkhia bad ong ruh ba la sngew donkam ban bishar bniah biang ïa katei ka bhah thungkam thungjam na ka bynta ka jingmyntoi bad ka hok ba mar katjuh ïa ki samla jong ka jylla.
“Ngi la rai ban shong pyrkhat biang bad ki riewshemphang la ka i donkam neem ban phah bishar bniah biang halor kane ka bynta. Hadien ba ngi la dep ban bishar, ngi lah ruh ban buh ïa kane ka phang ha ka sorkar jylla kumno ban leh lane ha ka election manifesto jong ka party,” u la ong.
Shuh shuh u ong ruh ba kim lah ban kyntait ïa ka jingshisha ba ka jingdon ki nongshong shnong ha ri Khasi – Jaiñtia ka kham bun shah bad ïa ka jingbun briew ha rilum Garo. Kumta u la long ba lada ïa kren ba kan long marbiang, kumta donkam ban da peit sani bha halor kane ka bynta ruh. Hynrei u la ong pat, “Ka rai kaba khatduh hi kan dei hadien ba ngi la ïa shong pyrkhat bad lum lut ki jingtip kaei kaba bha tam kaba iadei bad kane ka bhah thungkam thung jam.” Na ka liang u Bah Pangniang u la banjur biang ruh da kaba ong ba tang ka jingai noh la ka jong ka jylla Khasi – Jaintia State bad ka Garoland kaban weng lut ïa kitei ki jingeh baroh.
U Bah Pangniang u la ong ruh ba halor katei ka jingdawa la ka jong ka jylla, kum ka party kin ïai buddien bad ïai dawa bad buh hakhmat eh ruh ha ka mat ïakhun elekshon ban pynsngewthuh ïa ki paidbah ka jylla.