Shillong, Naiwieng 01: Ka jingbym don ka postal office hapoh ka thaiñ Laban ka la wanrah ka jingeh ïa ki nongshong shnong kaba dei kawei ka jaka kaba heh bha bad kaba bun briew tam hapoh ka nongbah Shillong.
Watla ka pin code jong ka post office ka don na ka bynta ka Laban, hynrei ka post office kam shym la don satia ha kane ka thaiñ mynta la kumba 2 snem.
Haba kren ha ka prokram ba la pynlong da ka General Post Office (GPO), uwei na ki heh ophisar u la ong ba ki dang pyrshang ban shem ïa ka jaka kaba biang ban ïoh buh noh ïa ka post office na ka bynta ka Laban branch.
Ka Laban branch ka im hynrei mynta ka la treikam beit napoh main GPO. Tang shu la ïoh ïa ka jaka kaba biang ynsa lah ban buh ïa ka Laban branch, ïathuh utei u heh ophisar.
