Shillong, Nailar 22 : U Bah Banteidor Lyngdoh, Myntri ba dei khmih ïa ka tnad kam rep ka Sorkar Jylla u la ong ba ki don kiba thmu ïalam bakla ban ong ba ka ‘office order’ kaba la pynmih ha ka 09 tarik u Nailar, 2022 na ka bynta ban ailad ïa ki nongrep ban ïoh thied dawai sboh na ka bynta ki jingthung jingrep jong ki ba ka dei tang ka kot kai.
ïa kane u Bah Banteidor u la pyntip haba kren kum u kongsan ha ka jingïalang pynbna bad pynsngewthuh paidbah sha ki nongrep bad nongïalam shnong halor ka jingwanrah ka tnad kam rep ban ïoh pyndonkam biang ïa ka sboh dawai kum ka Urea, ka DAP, MOP bad SSP bad kiwei pat mynta ka sngi ka 22 tarik u Nailar, 2022 ha Mawkatheiñ.
U la ong ba ka long kaba bakla ban pyrkhat ba ka jingailad biang ban pyndonkam dawai sboh ka dei ka kam ïohnong saiñpyrthei hynrei ki dei ban sngewthuh ba ka dei na ka bynta ki nongrep ban kyntiew ïa ka ïoh ka kot jong ki. “Baroh la shu ïa ieid nongrep tang ha ka por elekshon bad tang dep la klet”, u la kynthoh.
Halor ka jingïakren ba yn sa mih da kiwei pat ki Notification nalor kane Office Order, u la ong, “Lada kan long kumta kan dei ruh ka jingjop ïa ki nongrep”. U la ong ba un her sha Delhi ban pynioh noh ïa ka bhah dawai sboh sha ki nongrep ka Jylla da kaba un leit ïakynduh ïa u Myntri ba dei peit ïa ka tnad kam rep ka Sorkar India ha ki khyndiat sngi ban wan khnang ba ka jingmyntoi sha ki paidbah kan poi kloi noh.
U Myntri u la ong ba ka tnad kam rep bad ki ophis BDO ha ki Block bapher bapher kin ïatreilang ban shim jingithuh ïa ki jaka rep kiba ki nongrep kin lah ban shim dawai sboh. “Kane ka dei ka jingjop jong phi bad ngam kwah ban ïaleh ïohnong saiñpyrthei na ka bynta ka iap ka im ki nongrep kiba la mad sohsat la katta snem nalor ka jingwan lynshop ka khlam COVID-19 ha ki snem kiba la dep “, u la ong.
Ha ka jingïalang la wan ban shim bynta da ki hajar ngut ki nongrep na kylleng ki shnong ki thaw ha ka jingïadon lang ruh u Bah Gavin M Mylliem, MLA ka Sohra, ki ophisar ba kynthup ïa ka Kong R Majaw, Director kaba la pynshai halor ka Office Order, ki nongïalam shnong, ki nongïalam na ki synjuk nongrep bapher bapher ba kynthup ia ka JAC Ri Lum Farmers’ Grievances and Redressal Forum.
Ki nongai jingkren ha ka jingïalang naduh ki nongrep, ki sengbhalang, ki synjuk nongrep, ki nongïalam shnong ki la pynpaw ka jingkyrshan ïa ka Office Order na ka tnad kam rep bad pynrem ruh ïa ki katto katne kiba sdang leh ïohnong saiñpyrthei na kane ka mat ïakren kaba ki paidbah ki la angnud ban urlong la kham slem.
Kane ka Office Order ka la wan hadien 8 snem tam naduh ba ka Sorkar Jylla barim lyngba ka tnad ka la pynsangeh ïa ka subsidy na ka bynta ki dawai sboh sha ki nongrep ha ka 12 tarik u Jylliew, 2014 khnang ban pynduna ïa ka jingktah ki dawai sboh ïa ka koit ka khiah ki nongshong shnong bad kane la wanrah ka jingkhaïi tuh ïa ka dawai sboh bad ki nongrep ki kyang shla na ka jingkiew dor.
Ha kane ka sngi mar ia wai ka jingïalang, ki nongrep ki la tur sha khmat ban leit ai khublei ïa u Myntri na ka bynta ka jingleh shitom jong u ban pyllait noh ïa ki paidbah nongrep ka Jylla na ka jingsohsat ban ïoh ïa ka dawai sboh ha ryngkat ka jingshah khniot dor kaba long shaba palat na ka jingkhaïi tuh.
