Don kiba leit die noh ïa ki sniang ba ïoh na ka sorkar, maham tyngeh u Dy CM

Tynring, Nailur 01 : U Symbud Myntri Rangbah ka jylla, Bah Prestone Tynsong ha kane ka sngi Palei u la maham lypa ba ki paidbah ba ïoh ïa ki khun sniang na ka tnad Veterinary ba kim dei satia ban leit die noh ïa ki hynrei ban ri ban sumar bad pynheh pynsan ïa ki.
“Tang kawei kaba nga kwah ban ong, don ki briew tang mar ïa sam sniang lashai ki leit die noh. Kumta nga kyntu ïa kine kiba ïoh mynta ïa ki lai tylli ki sniang kynthei bad uwei u sniang shynrang sngewbha wat die lada phi die ngim ai shuh,” u la ong ha ka jingïalang sam paidbah ïa ki khun sniang sha ki 500 tylli ki longïing kiba hap ha ka Mawryngkneng Constituency lyngba ka skim Rural Backyard Piggery jong ka National Livestock Mission.
Nalorkata, u ong ruh ba ki la dep ban khein ruh ba lada jia ba hapoh shibnai naduh mynta ka sngi lada don ki sniang kiba ïap na ka liang ka tnad mardor kan bujli noh da kiwei.
“Katkum ka jingïathuh ki riewstad, kine ki sniang tang dap phra bnai shajrong ki la lah ban kha khun arsien shisnem ha kaba kawei ka sniang kan kha 6 tylli bad 12 tylli lada khein lang ha ka shisnem. Lada die tad eh uwei 4000 tyngka kumta lada 12 tylli ka la poi 48000 tyngka tang na kawei ka longkmie, lada lai tylli ka pisa ka la bun bad kane ka long ka jingkyrkhu ïa phi hi.”
Shwa kane, u Symbud Myntri Rangbah u la ïathuh ruh ba ka sorkar ka buh thong ban ai ïa kitei ki khun sniang sha ki 16000 tylli ki longïing bad kan dang bteng ban pynbun shuh shuh ruh kham hadien.
“La mang haduh 41 klur tyngka bad yn peit ba hapoh u Nohprah yn ai shuh shuh ym duna ïa ka 26000 haduh 30,000 tylli ki longïing kiban ïoh jingmyntoi,” la pyntip biang.
Na ka liang jong u Kongsan, u kyntu ruh ïa ka Director ka tnad ba kan pyntikna ba ki ophis treikam bapher bapher jong ka Veterinary kiba don ha kylleng ka jylla ba kin pynkhlaiñ ïa ka rukom treikam khnang ba ka jingpyntreikam ïa kane ka skim kan long kaba seisoh. Ha kajuh ka por u kyntu ruh ïa ka ban peit ruh ba ki doktor kin shimkhia ïa ka kam.
U kyntu ruh ïa ki paidbah ba lada jia ba kitei ki sniang ki pang mardor ki dei ban rah ïa kine sha ki sub centre lane ki dispensary ba sumar ïa ki jingri khnang ba kin ym ïap ei.
Na ka liang u MLA pat u la ong ba ha Mawryngkneng constituency ym duna ïa ka 75 persen ki dei ki nongrep bad nongri jingri kumta u la kyntu ïa u Symbud Myntri Rangbah ban mang kham bun shuh shuh ki nongïoh jingmyntoi na katei ka thaiñ ban ïoh ïa kitei ki khun sniang. U ong ruh ba katei ka la dei ka jingkyrkhu kaba markhmat na ka bynta kiba bun ki longïing kiba duk ban kyntiew ïa ka kamai kajih jong ki.
“Kane ka skim ka ïadei bha na ka bynta ka thaiñ jongngi namar naduh ka jinglong ka jaka haduh ka jinglong ka mariang ka ïahap bha na ka bynta ban kyntiew ïa ka kamai kajih jong ki nongshong shnong. Da ka jingïarap jong ka sorkar ngi don ka jingkyrmen ba ha ki 5 bad 10 snem ban wan ngin sa ïoh ban long ka constituency kaba nyngkong eh ha ka liang ka kam ri jingri bad ruh ha ka rep ka riang,” u la ong.
Ha kajuh ka por, ka Dr. A Laloo haba jubab halor ka jingkren jong u Symbud Myntri Rangbah ka la kular ban peit ba kin pyntikna ba ki doktor kin shimkhia ïa ka kam na ka bynta ka jingmyntoi lang jong u paidbah.
Ha kane ka sngi la ïoh ruh ïa ka jingkren na u MLA bad MDC ka thaiñ Bah Pynïaid Sing Syiem, nangta na u Principal Secretary ka tnad u GHP Raju, na u Secretary ka ntad u Dr. Manjunatha bad ruh na ka Dr. A Laloo Director ka tnad.