Shillong, Lber 25 : U Symbud Myntri Rangbah ka jylla u bah Prestone Tynsong u la ong mynta ka Sngi Thohdieng ba ki don ki kynhun ne ki briew ki bym kwah ba kane ka jingïapynbeit pud hapdeng ka Meghalaya bad Assam kaba la sahteng mynta la 50 snem ba kan ïaid shakhmat bad poi sha ka thong.
“ Nga sheptieng ba ki don ki kynhun jongki briew kiba ym kwah ba kane ka kam ïa pynbeit pud kan poi sha ka thong ne kan long kaba seisoh” ong u bah Prestone haba ïakren bad ki nongthoh khubor khamtam halor ka Memorandum of Understanding (MoU) ba la ïasoi ka Meghalaya bad Assam ban pynbeit shwa ïa u pud ha ki 6 tylli ki jaka ne ki 12 tylli kiba don hapdeng ka jingïakajia pud.
Ula ong kiba bun hi ki paid nongshong shnong ka jylla ki kwah ba kane ka kam ba la sahteng la sanphew snem mynta kan poi shaba kut. U la ong ruh ba ki paidbah ki donkam ruh ban ïasngewthuh ba haba ïakren ïa pynbeit bad kano kano ka kam khamtam ha kane ka kam pud hap hi ban ïa sngewthuh jingmut hapdeng ka Meghalaya bad Assam bad hap ban pynhun ïa baroh arliang mamla kan don ka jingïoh nong bad kan don ka jingduh nong ruh.
“ Ka jingshisha ka long haba ïa pynbeit ka dei ban don ka lynti hapdeng la ka long kaba ïoh jingmyntoi ne kaba duh jingmyntoi ruh namar ïa kane ka jingshisha ym lah ban lait don ki jaka ban duh don ki jaka ban ïoh kan ym lah long ba kan duh lut beit ka Assam ne ha kajuh ka por kan duh lut ka Meghalaya. Don ki ban wan sha ka jylla don ki ban leit sha ka Assam ruh kata ka dei ka jingshisha hap ban ïa pynbeit lang da kaba ïasngewthuh jingmut” ong u bah Tynsong.
“ Ngi ïeng skhem halor kane ka nongrim namar lada ym lah ban pynbeit mynta ka bha ban ym ïa pynbeit shuh hi ruh bad ka jingtim kan long ïa ngi ki nongïalam ba mynta ha ki lawei ne pateng ban wan. Lada ym lah ban pynbeit mynta khlem pep kan bteng biang sa 50 snem ka jingïa kajia. Kumta khnang ban ïaid beit hap ban pdiang ïaki jingshisha. Lah biang te lah biang, to ngin ïeng tylli lang bad ïapynbeit lang ïa kane ka kam ba sahteng khnang ba ki pateng ban wan 50 snem ne 10 snem kin ïoh ban ïashong suk shongsaiñ bad lait na kino kino ki jingkulmar” ong biang u Symbud Myntri Rangbah.
U la ïathuh ba um pat lah ban ong kaei ka jingmih ha ka jingïakynduh bad u Myntri Kam pohïing ka ri u Amit Shah ha ka 29 tarik namar hadien ka jingïakren yn sa sngewthuh kaei kaba ka sorkar pdeng ka kwah halor ka MoU ba la ïasoi da ki ar tylli ki jylla. “ Ailad ngin ïa kynduh shwa ïa u bad ngin sa batai ïa phi kaei ka jingmih naka jingïakynduh bad ïakren” ong u bah Prestone.
Ula ong ka jingjurip biang kan long ruh da ka Survey of India bad ïa kane yn leh hadien ka jingïakynduh bad u myntri kam pohïing.
Shuh shuh u Symbud Myntri Rangbah u la ïathuh ruh ba ha kane ka jingïakynduh bad u myntri kam pohïing kin ïakren lut ïa baroh ki kam ba sahteng jongka jylla kata naduh ka Inner Line Permit,(ILP) ka jingpynrung ïa ka ktien Khasi bad Garo ha ka Khyrnit kaba Phra nalor kane ka kam ïa pynbeit pud.
