Don ki Pastor na Wales ki bym tip bha ïa ka jingïadei ka Balang na Wales bad ka Ri Khasi

Mairang, Nailur 05: U Moderator jong ka KJP Synod Sepngi, u Rev. WP Marbañiang, mynta ka sngi u la pyllait paidbah ïa ka kot ba la thoh da u Rev. GR Mawblei, ba la ai kyrteng, “Ka Jingim, Ka Jingtrei, Ka Pyrkhat Theology bad ka Doctrine”.
Ïa kane ka Kot, la pyllait ha ka jingïalang kaba la long ha ïing Ribaibal jong ka Mairang Presbytery, ha kaba la ïadon lang ruh u Rev. GPL Gadew, Rev. IW Nongsiej, baroh arngut ki Ex Moderator ka KJP Synod Sepngi bad ki Pastor ka Mairang Presbytery. La ïadon lang ruh kiwei ki Pastor bad Pro Pastor jong ka Mairang Presbytery bad Mawshut Presbytery bad kiba haïing hasem u Pastor Mawblei.
Ha kaba ïadei bad kane ka kot, na ka liang u Pastor Mawblei uba la ju thoh bad pynmih ruh bun tylli ki kot kiba ïadei bad ka Balang, u la ong ba kadei ka kot kaba batai shaphang ka jingim jong u, ha kaba u la ong ba wat lada u la wan na ka longïing kaba duk, pynban um shym la duh jingkyrmen ban leit skul bad khamtam eh ban trei ïing kaba duk, pynban um shym la duh jingkyrmen ban leit skul bad khamtam eh ban trei ïa ka kam U Blei.
Shuh shuh u Pastor uba la shongthait na ka kam ha ka snem 2021, u la ïathuh ba ha kane ka kot, u la thih ruh halor ka jingleit pule jong u sha Ri Wales da ka jingkyrsha pisa ka Synod rim tad haduh ba un da wanphai noh sha ri la jong, ha kaba u la bat ruh ïa ka kam kum u Secretary bad Moderator ka Synod.
U la ong ruh ba kane ka kot kaba don lang ka bynta ba la pynwan sha ka ktien Phareng da u Rev GC Lyndem, yn phah ruh sha Wales halor ka jingkyrpad ka General Secretary ka Presbyterian Church of Wales, khnang ba ki Pastor ka Balang Kmie kin tip ïa ka jingtreikam bad ka jingshakri ba radbah ka Balang Presbyterian na ri Wales ha kine ki Lum Khasi, ïa kaba kiba bun ki Pastor ha kiba mynta kim kham tip shuh ïa ki kam radbah bad ka jingïadei ka Balang Presbyterian na ri Wales bad ka Balang Presbyterian ha kane ka Ri Khasi bad ha ka thaiñ Shatei Lammihngi hi baroh kawei.