Don ki kompeni ba khlem ïoh laisen ki treikam ban pynïaid pat ïa ki taxi ar shaka ba long beaiñ: Adelbert

Shillong, Risaw 13: U MLA ba shah sospon ka VPP na North Shillong constituency u Bah Adelbert Nongrum ha ka sngi Nyngkong ula phah tuklar ha u Symbud Myntri Rangbah ba khmih ïa ka tnat ka Kit ka Bah (Transport) u Bah Sniawbhalang Dhar halor ka jingkynnoh ba don ki Company ki bym pat don Licence kiba treikam kum ki Aggregator ban pynïaid taxi ar shaka kaba long beaiñ katkum ka Meghalaya Taxi Aggregator Operational Rules, 2020 bad halor ka jingslem ka Sorkar ban ai jingbit ïa ka Jets 24×7 ban ïoh jingbit ban sdang kamai taxi da ki ar shaka.
Haba ïadei bad kane haba kren bad shaki lad pathai khubor, u Bah Adelbert u la ong ba watla ka Jets 24×7 ka la pynbiang ïa baroh ki kyndon ba donkam, hynrei haduh mynta ka dang mad jingeh namar ka Sorkar kam pat ai jingbit ban ïoh sdang kamai taxi da ki ar shaka.
U la ong ba ka Jets 24×7 ka la ap mynta la palat 11 bnai ban ïoh jingmynjur na ka Sorkar hynrei haduh mynta ka Sorkar kam pat phah ktien, la ka Company ka la ïoh ne em ïa ka jingbit ban sdang kamai.
U la ong da kaba bynrap, “Nga sngewkhia jur ym tang ïa ka jingbym leh eiei pyrshah ïa ki Company ba pynïaid kamai da ki arshaka hynrei ruh ïa ka rukom bym ryntih bad bym ïahap ka rukom pynïaid ka Regional Transport Authority (RTA). Ka Jets 24×7 ka la pynbiang ïa baroh ki kyndon ba donkam, hynrei kam pat ïoh ka jingmynjur ban sdang kamai la palat 11 bnai. Kane ka jingleh ka tnat Transport ka long ka bym lah ban pdiang.”
U MLA u la ther tyngeh ruh ïa ka tnat halor ka jingleh bym suidñiew ka tnat ïa ki Company ki bym pat ïoh License ban kamai hapoh ka Jylla kaba pynkheiñ ïa ka Meghalaya Taxi Aggregator Operational Rules, 2020. U la buh ruh ka jingkylli da kaba ong, “Balei ka tnat ka ailad ïa kum kine ki jingpynkheiñ kiba paw pyrthei katba ka pynslem ban ai ka jingmynjur ïa ka Company trai Jylla?, bad bynrap da kaba ong, “kane kan pynshlur ïa ki kam beaiñ bad ka wanrah ïa ki jingma kiba shisha ïa ki nongleit nongwan.”
U la bynrap ruh da kaba ong, “Kane ka jingpynslem ym tang ka pynduh mynsiem ïa ka jingseng kam seng jam kaba hok hynrei ka buh ruh ha ka jingma ïa ka jingim jong kiba bun ki samla bym don kam don jam kiba la aiti ha kane ka rynsan da ka jingsngewbha.”
U Bah Nongrum u la ban jur ba ka kamram jong ka Sorkar ka dei ban kyntiew bad kyrshan ïa ka kam seng kam seng jam kaba hok, ym ban pynduh mynsiem ïa ka lyngba ka jingshim rai kaba slem bad kaba khlem ïahab.
U la ong, “Nga la thrang ban ïohi ïa ka jingshim khia jong phi mardor na ka bynta ka jingbha jingmiat jong ki samla jong ngi namar ba ka Sorkar ka dei ban long kaba ai mynsiem ym ban pynduh mynsiem.”
Katkum ka jingong jong u, ka Sorkar ka dei ban phah ïa ka khubor kaba shai ba ka jingsynshar kaba pynshong nongrim ha ki kyndon bad ka rukom treikam kaba hok bad kaba khuid ka dang don.