Don ki jingrwai Khasi kiba pynhiar dor ïa ka ktien Khasi, wat thaw tang dep, maham u CEM

Shillong, Jylliew 30 : Ka jingdon ki jingrwai Khasi kiba la shu thaw tang dep rukom, ka la pynlong ïa u Chief Executive Member ka KHADC, Bah Titos W Chyne ban pynpaw ïa ka jingsngewsyier namar kitei ki jait jingrwai ki lah ban pynhiar dor pynban ïa ka jingmut ba kyrpang jong ki kyntien Khasi.
“Kaba i sheptieng ka long ba ïoh ngi bakla ha ka rukom ban thaw ïa ki jingrwai namar katba nang mih ki sngi la ïohi ba ki jingrwai ki la nang pynhiar dor pynban ïa ka jingmut ba kyrpang jong ki kyntien Khasi,” u la ong haba kren kum u Kongsan ha ka jingplie ïa ka ‘State Level Symposium ba la pynlong da ka Khasi bad History Department jong ka Sohra Government College hynne ka sngi Palei ha katei ka College hi halor ka phangpdeng – Ka jingbuh dor ïa ki jingrwai Khasi ba la thoh da ki nongrwai bapher bapher.
Da kaba pynpaw ba ha kawei pat ka liang ki sngewdonbok ba ka Jaidbynriew ka don shibun ki Myllung bad ki nongthaw jingrwai, hynrei u la ong ba lada nujor ïa ki nongthaw jingrwai kiba mynta bad kiba mynnor pat ki la don shibun ki jingïapher.
Kumta, u la ong ba la sngewdei kum ka Jaidbynriew ban maham ïa kito kiba thaw jingrwai ba ki dei ban da pyrkhat bad ngam jylliew bha ym ban shu thaw katba lap ne katba wan na khlieh. “Ym dei ruh ban shu tuh ïa ki jingrwai kiba nabar namar kane kan buh kylla ha ka jingma,” u la bynrap biang.
U ong ruh ba u sngewdonbok haduh katta katta ba ka Sohra College ka ïoh ban pynlong ïa katei ka symposium. Haba ïadei bad ka jingsdang jong ka College ïa ka certificate course ban hikai tem bad put tynrai, u Kongsan u la ong ba kum u nongmihkhmat u ai ka jingïaroh kaba khraw halor katei ka sienjam. “Kum u CEM nga la ïohlad mynta arsnem shiteng kum u khliehduh jong ka Council kaba baroh ki ong ba kadei ban ïada ïa ka riti dustur. Hynrei teng teng ha kine ki phew snem ka tnad Arts and Culture jong ka Council lane kumjuh jong ka sorkar jylla ki long tang ka shynrong namar haba phai ïa ka mang tyngka kadei kaba duna bad kaba rit tam eh.”
Kumta, halor kane, u la ong ba naduh ka mang tyngka kaban wan ha Council un wad lad ban kyntiew noh khambun na ka bynta katei ka tnad. “Baroh shi katta u MDC u ïoh tang 30hajar na ka tnad Arts and Culture, kumta ïano un ai haba hi set ki tiar tem tynrai ki poi lak tyngka,” u la bynrap shuh shuh.
Shuh shuh u ong ruh ba kum u nongmihkhmat un bteng ban treilang bad katei ka college bad kyntu ruh ïa ki bor pynïaid jong ka College ba kin pynkhreh ïa ka projek kyrpang na ka bynta katei ka department bad phah sha u kum u CEM ka KHADC ban mang ïa ka bhah kaba kyrpang. “Nga sngew sarong ba ngan sdang nyngkong na ka thaiñ lajong ha shwa ba ngan ai sha kiwei kiwei pat ki jaka.”
Hadien kane, u Bah Titos u la aiti ruh ïa ka work order kaba 10 lak tyngka sha katei ka college na ka bynta ban shna ïa ka jaka pynlang um slap ne ka ‘rain water harvesting’. Ka jingthmu jong kane ka long ba ha ka por ba jur u slap kin lah ban pynlang ïa katei ka um bad buh pat ha ki jaka pynlang um kiba la shna kyrpang khnang ban ïoh pyndonkam pat ha ki por ba tyrkhong um.
Ha kane ka sngi la ïoh ruh ïa ka jingkren kaba sngewtynnad na bun ki riewshemphang kynthup naduh u Dr. Ailynti Nongbri Head of Department jong ka sobjek Khasi na Shillong College bad ruh ka jingkren na i Principal ka College, Dr. A Lyngdoh, Kiwei kiwei ki riewshemphang kiba kren ha kane ka sngi ki kynthup ia u Dr. David Diengdoh na Jaintia Eastern College), Banniewkor Nongbri, Research Scholar na North-Eastern Hill University, Iasaid Khongjee na St. John Bosco Boys’ Higher Secondary School, Sohra, Kong Kmensila Budson, Rtd. Programme Executive, All India Radio, Shillong, Arkidor Burom Lyngdoh, Assistant Professor, Sohra Government College, Sohra, Firtmorningmarch Wanniang ba dei Music Instructor, Nongstoin College, Nongstoin bad kiwei kiwei.
ïa katei ka prokram ha katei ka sngi la wan ban pynhap pyrda da u MLA ka thaiñ Bah Gavin Mylliem.nalor kiwei kiwei.
Ha katei ka prokram la wan ban shim bynta da ki nonghikai na ki college bapher bapher kumjuh ruh ki samla pule jong katei ka college.