Don ki jaka bym ïakajia ruh la ai sha Assam, CM, Dy. CM wat leh kum ka nongkynti shimet : VPP

Shillong, ïaïong 04: Ka Voice of the People Party (VPP) ka la pynpaw ka jingsngew lyngngoh kaba jur banïohi lyngba ka MoU ba la ïasoi hapdeng ka Meghalaya bad Assam ban don ki Shnong ki bym don satia hapdeng ka jingïakajia pud bad kiba hap beit ha Meghalaya, hynrei la pynhap nih sha Assam.
Kane ka long katkum ka kyrwoh ba la phah da u President ka VPP, u Bah Ardent Miller Basaïawmoit mynta ka sngi.
U Bah Ardent u la ong ruh ka sorkar Meghalaya ka la kular ruh sha ki paidbah nongshong shnong ka jylla ba na ka liang ka sorkar Meghalaya ka la shim da ka sienjam ba ka jingiapynbeit kan long halor ka nongrim jong ka “Ai bad Shim markylliang ïa ki jaka kiba don ha ki bynta khappud jong baroh artylli ki jylla. Namarkata, lakhmih lynti ba ki ar jylla kin pynkhreh ïa ki kyrteng ki shnong ba dei ban leit na Meghalaya sha Assam bad kiba dei ban wan na Assam sha Meghalaya. Hynrei, phewse hadien ba la pyllait paidbah sha ki lad pathai khubor ïa ki kyndon ba la ïa mynjur la lap ba tang ki shnong kiba hap ha Meghalaya kin leit noh sha Assam.
U Bah Ardent u la ong ruh ba kumba la kdew ha u Kyrwoh sha ki lad pathai khubor ba dang shen, ba na ka liang ka VPP ka la sngewdei ban ai ïa kane ka sorkar ka jingshaniah ba ka don ïa ka jingthmu kaba khuid (the benefit of the doubt) ha kaba ïadei bad ka jingpyrshang ban pynbeit noh ïa u pud u sam bad ka jylla Assam. Dei na kata ka daw ka party kam shym la kwah satia ban ai ïa kino kino ki jingkynthoh kiba lah ban wanrah ïa ka dur ka dar jong ka jingleh politik ha kaba ïadei bad kane ka kam. Hynrei, hadien ba la dep ïasoi ïa ka soskular sngewthuh jingmut (MoU) bad ka jingpynlait paidbah sha ki lad pathai khubor ïa ki soskular ba la ïasoi, ka Voice of the People Party ka sngew ba ka dei ka kamram bad ka deiti jong ka ban kren ïa kane ka mat, ha ryngkat ka kyrwoh kaba shai ba ka party kam mynjur ne pdiang satia ïa kane ka kam ba la pynbeit hapdeng ka sorkar Meghalaya bad ka sorkar Assam.
Kane ka jingleh jong ki nongialam kane ka sorkar kaba mynta ka la wanrah ïa ki jingpynrem bad jingbym sngewhun na kiba bun ki liang bad ruh ka la pynbitar tyngeh ïa ki paidbah kiba shong ha ki jaka khap pud. Dei halor kine ki nongrim ba ka VPP ka don ban pynshai ba kan nym lah ban pdiang ïa kane ka soskular. Ka VPP ka kwah ruh ban pynsngew da kaba shai ïa u Myntri Rangbah, u Conrad Sangma bad ïa u Myntri Rangbah Symbud, u Bah Prestone Tynsong ba ki jaka kiba hap ha ki bynta khap pud kim dei satia ki nongkynti jong ki shimet bad kumta kim lah satia ban shu rai katba ki sngewmon ma ki.