Don ki dalal Khasi kiba kamai spah, ban tehlakam ïa ka jingrung ki mynder Bangladeshi ka long kaba eh: KSU

Khliehriat, Jylliew, 01: Ka Khasi Students Union (KSU) South West Border Area Circle East Jaiñtia Hills District ka la kynthoh tyngeh halor ka jingbym lah ban tehlakam ïa ka jingrung tuh jong ki mynder Bangladeshi sha u pud u sam jong ka District da kaba kynnoh ba ki don ki Khasi kiba leh dalal tang ban kamai spah khlem da kheiñ shuh ïa ka ïap ka im bad ka jingshngaiñ jong ka district bad ka jylla baroh kawei.
Ka seng ka pynrem jur ïa ki dalal kiba ïarap ban pynrung laitlan ïa ki mynder Bangladeshi shapoh ka East Jaiñtia Hills District lyngba ki jaka khappud.
“Watla bunsien na ka liang ki paidbah nong shnong shnong, ki khun samla ki la pyrshang katba lah ban tehlakam ïa kane ka jingrung beaiñ ki mynder Bangladeshi shapoh ka jylla hynrei ki don pynban ki kynhun ba dei ki Khasi kiba ju leh dalal da kaba ïarap ban pynrung ïa kum kine ki mynder. Kine ki kynhun ki la shim ïa kane ka kam kum ka kam kamai spah bad ka la poi shaduh u pud ba ki ju maham ruh wat ïa ki trai shnong sha ki thaiñ khappud ba kim dei ban tuklar ïa kane ka kam beaiñ jong ki,” la ong u kyrwoh na ka KSU.
Ka KSU ka la pyntip ba ka dang ïai pyrshang ban tehlakam hynrei kane ka kam ka la kylla long kaba eh bha namar ka jingdon ki dalal. Ka seng ka la pyntip shuh shuh ba kine ki kynhun kiba dalal ki kam ruh ba kane ka dei ka rukom kamai spah jong ki bad ym dei ban tuklar ïoh jia pynban kaei kaei kaba sngewsih ïa kiba tuklar.
“Kum ban shu pynkynmaw ba ka la don kawei ka khep ba ki shipai BSF ki la ïoh bat lai ngut ki briew kiba dei ki mynder Bangladeshi kiba wan rung tuh sha jylla jong ngi, hynrei kaba sngewsih ka long ba ym shem la ïohkem pat ïa ki briew kiba ïalam lynti bad kane ka jingbym ïohkem ki shipai ïa ki dalal ka buh jingma shuh shuh ïa ka jylla jong ngi,” pynpaw ka seng ha u kyrwoh.
Ka Seng ka la kyntu ïa ka tnat Pulit jong ka East Jaiñtia Hills District ba leit jurip hi dalade sha ki jaka ha khappud khnang ban dup lap ïa ka jingshisha namarba kane kam dei tang ka jingrung beaiñ hynrei ka dei ruh kaba buh jingma ym tang ïa ka jylla hynrei ïa ka ri India baroh kawei khamtam ba mynta ka ri India ka dang don hapdeng ka jingïakynad hapdeng ki ar tylli ki ri, ka ri Bangladesh bad ka ri Pakistan.
Haba maham tyngeh ïa ki dalal, ka KSU ka la ong, “ngi dawa ïa ki dalal kiba ju mlien ban pynrung tuh ïa ki mynder Bangladeshi ba ki dei ban shah pynshitom da kaba tyngeh khamtam ban kheiñ ruh ïa ki kum kita ki nongpyrshah ri.”
Ka seng kan ïai ai ka kti kamon, ka kti ka diang bad ki shipai BSF ban dup lah ban tehlakam ïa kum kine ki kam beaiñ.