Shillong, Nailur 14 : Ka jingïalehkai Snooker watla kam pat da paw haduh katta katta kumba long ka phutbol lane kriket hynrei ki don bun ki briew kiba sngewtynnad ban ïalehkai ïa ka ha kane ka jylla.
Kumta, na ka liang ka National People’s Youth Front, Shillong City ryngkat ka jingïatreilang bad ka Meghalaya Billiards & Snooker Association ha ka sngi Balang ka la pynlong da ka All Shillong Open Snooker Tournament ïa kaba la wan ban plie paidbah da u Vice Chairman ka KHADC ba dei ruh u MDC ka Mawsynram, Bah Alvin Sawkmie ryngkat ka jingdonlang ki nongïalam katei ka synjuk.
Utei u nongmihkhmat ha kajuh ka por u dei ruh uwei na ki nongïalehkai ba sngewtynnad ban ïalehkai ïa ka Snooker.
Da kaba ïaroh ïa ka NPYF kaba pynlong ïa katei ka jingïalehkai, u Kongsan u la ong, “Kumba baroh phi tip ba kane ka jingïalehkai ka donkam shibun ka jingtbit.”
U General Secretary ka Snooker Association ha ka jingkren u la ong ba katei ka jingïalehkai ka ïarap ruh ban pynjai jai ïa kito kiba don ka jingkhuslai jingmut ba kin sting ka jingmut jingpyrkhat bad wat ban pynaram ïalade.
“Kane ka dei ka jait jingïalehkai kaba naduh kiba dang lai snem haduh kiba 103 snem ruh ki dang lah ban ïalehkai,” ong u General Secretary. Shuh shuh u la ïathuh ba katei ka kylla long ka jingïalehkai kaba khraw bha namar ïa ka la lap bad sdang naduh u snem 1875 bad haduh mynta ki la don haduh kumba 90 tylli ki ri kiba ïalehkai.
