Don ka jingbtuit ha ka jingpyntreikam ïa ka Sixth Schedule ba sa ïoh thied jaka kiba nabar jylla ha Meghalaya : UDP

Shillong, Rymphang 10 : U General Secretary ka UDP, Bah Jemino Mawthoh u la ong ba ka Khyrnit ba Hynriew ka dei lypa ka atiar kaba khlain bha ban ïada ïa ka khyndew ka shyiap hynrei ka don pat ka jingbakla haei re kaba plie lad ïa ki briew kiba nabar ba kin lah ban ban thied jaka.
Ïa kane u Bah Jemino u la kren ha ka jingialang paidbah kaba long ha Nongrah ban pan jingkyrshan ïa u kyrtong ka party ban ïakhun ïa ka elekshon MDC na Nongthymmai constituency.
Haba kren ha kane ka jingïalang, u Bah Jemino u la ong “Ngi la ïoh ïa ka Sixth Schedule ban ïada ïa ka khyndew ka shyiap bad ka riti ka dustur jong ngi hynrei ngi dei ban pdiang ba ki don ki jingbakla ha ki por ba la dep. Ngim dei ban kynnoh ïa ki briew kiba na shabar ka jylla. Mano ba die ïa ka khyndew ka shyiap jong ngi? Mano ba leh ïa ka Benami”?.
U la ong ruh ba ki don kiwei pat ki party kiba ïakhun ïa kane ka elekshon MDC hynrei na ka por sha ka por ki ju byrngem ban kyntu ïa ka sorkar pdeng ban pyntreikam noh ïa ka Article 371 bad ban pynduh noh ïa ka Sixth Schedule.
“Ha u snem 2015, ka la don ka jingïalang kaba heh tam ban ïakren halor ka Village Administration Bill ha madan Polo Shillong hynrei kane ka jingdawa haduh kine ki sngi kam pat ïohi ïa ka jingshai bad ka dei namar ka jingïakynad hapdeng ki nongïalam bad ki MDC ha KHADC” u la ong.
Shuh shuh u la ong ba kiwei pat ki jingdawa ba kynthup ïa ka ILP bad ban pynrung ïa ka ktien Khasi ha ka Khyrnit ba Phra ki dang sahkut ha ka sorkar pdeng.
“Ka VAB bad ka ILP ym shym la pyntreikam hynrei mynta ki la ïakren ïa ka Article 371 katba ïa ka Sixth Schedule kaba la don lypa, ki District Council ym shym la lah ban pyntreikam hok,” u la ong.
U Bah Jemino u la ong ba ka UDP ka la ïalam ïa ka Executive Committee jong ka KHADC la lai snem shiteng naduh u snem 2019 bad hapoh ka jingïalam jong ka UDP ka la mynjur ïa ka Land Act 2012 kaba la long ain ban pynskhem ïa ka rukom bat khyndew.
“Mynta ki paidbah kiba thied jaka kim donkam shuh ban rejistar ha ka tnad Revenue jong ka Sorkar Jylla. Kane ka aiñ ka la ai bor ruh ïa ki Dorbar Shnong, ki Dorbar Hima ban pynthikna ba kino kino ki kot ki sla ba la pynmih da ka KHADC ki dei ki kot ki sla kiba long katkum ka aiñ khamtam ban pan ram na ki Bank” u la ong.
U la bynrap ruh ba ka EC ba ïalam da ka UDP ka la wanrah ïa ka kyndon kaba mut ba ym lah ban thied jaka katba mon bad ki don ruh ki kyndon ban khang ban thied jaka katba mon khamtam ïa ki nongkhaii bad ki kompeni.
Haba ïa dei bad ka jingkynnoh ba ka UDP ka dei ka party kaba bud ia kiwei pat ki party, une u heh UDP u la ong, “Ngi la ïalam ïa ka EC ha KHADC la lai snem shiteng bad ka UDP kam ju bud ïa kiwei pat ki party”.
U Bah Jemnino u la ong ba wat ka BJP kaba ïalam ïa ka sorkar pdeng ka hap ban ïatreilang bad kiwei pat ki party kum ka TDP namar ba kane ka dei ka juk jong ka sorkar synrop.
Nangta u ong ba wat lada ka UDP ka ïatreilang bad kiwei pat ki seng sain pyrthei ban thaw ïa ka sorkar, hynrei kam sah tang kum ka nongpeitkai ïa ki kam bad ki jingthmu jong ka sorkar jylla.
“Haba don ka jingkhaii be-aiñ ïa u dewïong, ka UDP ka la pyrshah bad dawa hiar shuki ïa u Myntri ba dei peit ïa ka kam pohïing ka jylla. Haba la don ka jingkynnoh bamsap ha ka MeECL, ka UDP ka la dawa ban weng noh ïa u Myntri ba dei peit ïa ka tnad bor ding bad ïa u CMD. Ngim shym la sngap jar,” u la ong.