New Delhi, Nohprah 13 : Da ka jingkyrmen hadien ka jingjop kaba donburom ha ka Super Over, ki thei ïalehkai kriket ka India ki pynkhreh pat ïalade mynta ban pynjur ïa ka rukom ïalehkai khamtam ha ka rukom ap bol bad kawang bol pyrshah ïa ka Australia kaba dei ka kynhun ba khlain bor, ha ka T20I kaba lai kaban long ha kane ka sngi Balang
Ha ki ar tylli ki jing-ïakhun kiba shakhmat ha DY Patil stadium kaba long ha Navi Mumbai, ka kynhun ïalehkai ka ri kan leit pat sha Brabourne Stadium na bynta ka jingïakhun kaba bud.
Ka jingïakhun ha kane ka sngi u Blei ka sakhi ïa ka rukom ïalehkai kaba itynnad bha ha kaba ki don haduh 47000 ngut ki nongpeitkai kiba sakhi ïa katei ka jingïakhun.
Kumba long mynta ka India ka hap ban ïakhun tyngeh namar ka jingïakhun ka dang neh da mar 1-1 ha katei ka lympung ba don san tylli ki jingïakhun.
Watla ka India ka don ïa ka jingkyrmen ban lah ïalehkai bha bad ka Australia hynrei ka donkam pat ban hap pynjur ïa ka rukom ïalehkai ban khur ïa ka jingjop.
Kumba long ha ki jingïakhun ba la dep ki nongtied ki la lah ban ïalehkai bha hynrei kaba sah ka long sa tang ban pynbha ïa ka rukom kawang bol bad rukom ap bol. Lada phai ha ki jingïakhun ba la dep ka kynhun trai jaka ka la ïoh ban khur tang ar wiket ha ka series bad kata hi kaba pynkhuslai ïa ka kynhun baroh kawei. Kaba kham pynkhuslai ruh ka dei eh ïa ka rukom kawang bol.
Ka Renuka Thakur kaba dei kawei na ki thei kawang bol ba kham paw ha kine ki 6 bnai hynrei haduh mynta kam pat ïoh khur wiket. Ban kren ïa ka jingshisha, ka Renuka ka dang hap ban pynjanai ïa ka rukom ïalehkai.
Katba ka thei kawang spin, ka Devika Vaidya kaba ïakhun ïa ka T20 series kaba nyngkong ha ki phra snem ka dang hap ban pyntbit ha kane ka bynta ruh hadien ba ka khlem lah ban ïalehkai bha.
Kumba ka long mynta, ka Yastika Bhatia kam pat ïoh satia ban mih madan katba ka Jeminah Rodrigues pat ka hap ban pyntbit ïalade ha ka jingkamai ron hadien ar tylli ki jingbakla na sdang katba ka Shafila Verma pat ka hap ban pyntbit ïa ka rukom ïalehkai.
Na ka liang ka kapten jong ka kynhun Australia ka Alyssa Healy ka pynpaw ïa ka jingthrang ban ïalam nakhmat ban ïoh ïalehkai bha ha ka jingïakhun ha CCI.
Ka India kaba la pynkut ïa ka jingjop jong ka mynta u snem, na ka liang ka Healy ka la kam ba ka rukom kawang bol jong ka India ka la dei ban long kaba kham paka.
Katei ka jingong jong ka, kadei hadien ba ka thei kamai ron jong ka kynhun ka Beth Mooney ka la pyni ïa ka rukom ïalehkai kaba ym lah shuh ban pynsangeh. Ïa kane ruh la pynpaw da ka Tahola McGrath kaba don ha lain tied ba lai.
Ki la don haduh kumba saw ngut ki nongkawang bol ka India kiba ka jingkamai ron ka la kot sha ka 10 ron shi over ha ka jingïakhun ba ladep.
