Don jingïasylla ki riewsaiñ pyrthei bad ki mafia dewïong ba bteng ka tih dewïong be-aiñ ha jylla, ong ka Congress

Shillong, Rymphang 09: U Nongïalam ba la kham ih bha jong ka seng Congress ha Meghalaya u Bah Manuel Badwar u la kynthoh tyngeh ïa ka sorkar jylla da kaba kynnoh ba ka don ka jingïasylla hapdeng ki riewsaiñ pyrthei bad ki mafia dewïong kiba long ka daw jong ka jingpynshlur ïa ka kam tih dewïong beaiñ ba kan ïaibteng ha ka jylla Meghalaya haduh kine ki sngi ba la paw pen ryngkew syndon ha ka jylla bad ka ri baroh kawei.
U Bah Badwar u la ong, “Kadei ka kam lute, katba ka jylla ka la dang kylla long kaba duk, hynrei katto katne ki longïing kiba ïajan bad ka sorkar ki ïoh ban kheit ïa ki soh jong ki jingmyntoi.”
Na ka liang u Bah Badwar u la kynthoh ïa kane haba kren halor ka jingjia bthei bom dynamite kaba la jia ha ka 5 tarik mynta u bnai ha Thangsko, kaba dei ruh ka jingjia kaba dangshen kaba don ka jingïadei bad ka jingtih dewïong beaiñ kaba la treikam ha ki jaka tih dewïong kiba don ha ka jylla.
U nongïalam ka Congress haba nujor ïa kane ka kam bad ki jingeh kiba mih na ka kam dih drok, u la ong ba kadei ka jingduh kaba khraw bha ïa ka jylla. U la buh ka jingkylli ïa kaei kaba u ong ba kane baroh kadei ka jingbym shim kam jong ka sorkar, ha kaba ki briew kiba duk ba kyrduh ki hap ban trei ha ki jaka tih dewïong kiba long ka jingma khlem da don kiba peit bad ba sumar ïa ki ha kitei ki jaka.
Haba phai sha ka kam tih dewïong beaiñ, u nongïalam ka Congress u la kynnoh ïa ka sorkar ba watla ka la tip ïa ka jingpyndonkam ïa u dynamite bad ka jingïaid ka jingkit ïa u dewïong napoh ka jaka tih dewiong, hynrei ka pyni ba ki don bynta lang bad kane ka jingeh. “Ki paidbah ki dei ban jubab da kaba tyngeh ïa kum kine ki jingjia bad dei ban sngewthuh ba kine ki briew ki la lute na ngi,” u la ong.
Shuh shuh u Bah Badwar u la khot ïa kane ka jinglong jingman kumta ka jingjia kaba sniewdur tam kaba la jia ha ka imlang sahlang jong ka Meghalaya bad ka kam kaba la pynlehraiñ ïa ka jylla. U la dawa ka jingpynshitom kaba tyngeh na ka sorkar pdeng, ba kynthup ïa ka jingtohkit da ka Central Bureau of Investigation (CBI), bad ba ka Supreme Court kan ithuh ïa kane ka jingjia.
“U Myntri Rangbah u dei ban hiar shuki da ka dak ka jingburom. Haba 27 ngut ki briew kiba duk ki la duh ïa la ki jong ki jingim, bad lada u Myntri Rangbah u ïai ong ba kum kine ki kam ki dei kiba ym lah ban pdiang, hynrei ki dang ïaibteng, kane ka dei ka bym lah ban pdiang,” bynrap u nongïalam ka Congress.