Shillong, Risaw 14: Ki la don baroh 736 ki case ba la pynrung hapoh ka women helpline kaba ha Directorate of Social Welfare department ha kine ki 7 snem ba la leit.
Na kine, kumba 279 ki case ki dei kiba dang im bad 457 kidei kiba la dep ban pynkutnoh. Ka por ka dei naduh ka snem 2017 haduh ka 2024, ong ka khubor na ki heh ophisar ha ka sngi nyngkong.
Ha une u snem haduh u bnai Risaw, ki la don kumba 193 tylli ki case ba la iohpdiang da ka women helpline ha kaba na ki 60 kidei ki jingshah thombor ha ki ïing ki sem, 18 tylli ki dei na ki jingshah thombor lyngba ka online digital, 6 tylli ki dei ki emotional abuse/violence, 26 tylli ki dei ki legal dispute, 7 tylli ki kam halor ka koit ka khiah, 2 tylli ki ki kam shah ktah kti, 63 tylli kiwei pat, 4 tylli ki dei ki kam ba jah ki kynthei, 4 tylli ki kam shah thombor ha ki jaka paidbah bad ki jaka trei, 1 ka jingshah kren beiñ, 1 dei ka jingshah pynkynriah bad kawei dei ha ki jaka trei, ki la ong.
Ha kawei pat ka liang, ka child helpline ka la ïohpdiang palat 315 tylli ki case ha ka snem 2024-25. Na kine, 51 tylli ki case ki ïadei bad ki jingshah thombor ki khynnah, 2 tylli ki kam pynshong kurim ïa ki khynnah, 8 tylli dei ba shah ieh ki khynnah, 1 kadei ka jingpynbylla ïa ki khynnah, 11 tylli dei ba jah ki khynnah, 15 tylli dei ka jinglap ïa ki khynnah, 3 ki kam ba kyrni ha ka kam dih drok. 55 tylli dei ki kam ba la lah ban pyndep.
Ha u snem 2023-24, ki la bun ki case kiba don kumba 142 tylli dei kiba la ïohpdiang, ha kaba na kine 112 dei kiba la lah ban pyndep, ong ki heh ophisar.
Haba ai khublei ïa ka directorate halor ki kam shakri kiba ratbah, u Myntri ka tnat Social welfare u Bah Paul Lyngdoh u la ong, “Kumba phi la ïohi ïa ka jingshisha ba ka jingkiew jong ka jingjop, bad ban kyrshan ïa kine ki jingkheiñ ba la pyni mynta ka la long 90%.”
“Lada phi nujor ïa ka jinglong jingman ba mynta bad kaei kaba la long ha ki 10 snem mynshwa, ka don ka jingïapher kaba bun namar mynshwa ki briew ki kwah ban sngap jar. Kaba bun ba kin leit pyntip ka dei ba kin leit sha ki rangbah shnong bad dorbar shnong, kiba ym don ka lad ban shim ïa kine ki kam,” ong u Bah Lyngdoh.
Halor ki sienjam ba la shim da ka tnat halor kine ki kam ba shah thombor ki kynthei, u Bah Lyngdoh u la ong, “Ngi la kyntiew ka jingïasyllok bad kiba bun ki kynhun ka imlang sahlang, ki seng longkmie bad lyngba ki media, nga kwah ruh ban pynshlur ïa ki longkmie ban wan shakhmat.
Mynta ngi don ki helpline, kiba don manla ka minit. Kumta kam don kano kano kaba lah ban pynsangeh ïa ki longkmie ban ïasyllok bad ngi ha kiba bun ki jingeh.”
