Shillong, Rymphang 14: U Myntri Rangbah ka jylla u Conrad K. Sangma u la plie ïa ka Eklavya Model Residential School (EMRS) ha Samanda, Rikwarenggre ha East Garo Hills district, ha kaba kane ka long ka dak jong ka jingsdang ka snem pule jong kane ka jaka pule.
Ïa ka programme la shim bynta lang da u Marcuise N. Marak, Myntri ka tnat Housing, PHE Department bad Soil & Water Conservation, bad kiwei kiba la shah khot sngewbha.
Ka programme ka la sdang da ka jingregister ïa kiba shim bynta, kynthup ki khynnah pule EMRS, ki kmie ki kpa bad ki nongïalam. Ïa u Myntri Rangbah bad kiwei ki heh ki haiñ la synran bad ïalam sha ka jaka ba la pynkhreh da ki nongshad Wangala, ba la pynbud da ka jingplie pyrda ïa ka jingthoh buh sah kynmaw.
Ha ka jingkren u Myntri Rangbah u la batai ïa kane ka jingplie kum ka jingsah kynmaw bad ka sngi kaba don burom kaba long ruh sa kawei ka sak kaba kongsan kaba ïadei bad ki jingtei ka jylla ïa ka pule puthi.
Haba phai dien ïa ki jingïohi jngai jong u late P. A. Sangma bad ka jingngeit kaba jylliew ha ka pule puthi, u la ong ba kine ki jingpyrshang kiba dang ïaid ban pynkylla bad wanrah thymmai ïa ka jingpynïaid kam ha ka pule puthi jong ka jylla ka la pynlong ïa kane ka jingplie kaba kham don jingmut shuh shuh.
Haba banjur ïa ka jingkongsan jong ka pule puthi, u la ong ba ka pule puthi ka dei ka agent kaba khraw bha na ka bynta ka jingkylla bad ka jingwanrah ka roi ka san kaba khraw ïa ka ri, ka jylla bad ka imlang sahlang, bad bynrap ba da ka jingpynlut ha ka pule puthi kaba bha ha ki skul bad ki college na ka bynta ki samla kan wanrah ka jingmyntoi kaba neh slem bha.
Haba ïathuh ïa ka jingwanrah ki jingkylla ha ka pule puthi naduh ka snem 2018, u Myntri Rangbah u la ong ba la jan 80 percent jong ki skul LP bad UP ha kylleng ka jylla la dep ban shna thymmai ne ba la pynïoh da ki ïing kiba thymmai ha ki jaka pule ba donkam.
U la kdew ruh ba ïa ki MBOSE syllabus la dep ban kyntiew kyrdan bad ïa ki jingpynlong eksam ruh la dep ban pynbeit bha, bad da kaba wanrah ia ka CM Impact Book na ka bynta ki khynnah Class X ka la synniang sha ka jingpoi 96 percent pass percentage ha ki eksam SSLC mynshem snem.
U la bynrap ruh ba ka sorkar kan pynïar ïa ki jingpyrshang ban pynthymmai ruh sha ki skul Ad Hoc, SSA bad deficit bad ka jingpynbiang ka rukom siew tulop ïa ki nonghikai SSA ruh la lah ban pyndep ha kaba kane ka la wanrah ka jingkylla kaba bha ha kane ka bynta.
U Myntri Rangbah u la pyntip ruh ba ki don haduh 38 tylli ki skul EMRS ha kylleng ka jylla bad pynpaw ka jingïaroh ïa ka Ministry of Tribal Affairs bad ïa u Myntri Rangbahduh ka ri halor ki jingkyrshan jong ki.
Haba jubab ïa ki jingkyrpad jong ki bor pynïaid jong ka skul, u la pynbna ba haduh 20 tylli ki computer yn synniang sha ka jaka pule lyngba ka Chief Minister’s Special Development Fund bad pynthikna ïa ki jingeh halor ka telecom connectivity yn sa rah bad ki bor ba dei peit. U la kyrpad ruh ïa u Myntri ka PHE ban buddien ïa ka jingpynbha ka jingsam um sha kane ka skul.
Na ka liang u Marcuise N. Marak u la ai khublei ïa A’king Nokma ba la ai sngewbha ka jaka na ka bynta ka skul bad ong ba kane ka jaka pule kan long ka jingmyntoi na ka bynta ki samla pule na Samanda bad sha kiwei ki thaiñ ba marjan.
La ïoh ka jingkren lamphang na Dr. M. Nandagopal, Principal, EMRS, Samanda, ba la ïathuh ba ïa ka Eklavya Model Residential Schools kaba la ïalam da ka Ministry of Tribal Affairs, Government of India, la plie ha u snem 1997-98.
Kiwei kiba la kren ki kynthup ïa East Garo Hills Deputy Commissioner R. P. Marak, uba la ai ki kyntien pdiang sngewbha bad Samar Dey, Jt. DSEL, East Garo Hills, Williamnagar, ba la ai ki kyntien ai khublei.
Ki la don ki prokram bapher bapher ba la pyni sa ki samla pule ka EMRS, JNV, Williamnagar bad Do’kua CLF.
