Shillong, Risaw 19 : Ka Meghalaya ka la don lang ka bynta kaba khraw ha ka jingïoh rung jong ka India sha ka AFC U-17 Women’s Asia Cup kaban long ha China ha u Jymmang 2026 namar ki la don haduh arngut ki thei ïalehkai ba kynsai na ka jylla ha ka kynhun ba kynthup ïa ka Bonifilia Shullai bad ka Alisha Lyngdoh.
Ka jingïoh rung ka India sha katei ka lympung kaba heh tam ha dewbah Asia hadien bun bun phew snem kadei hadien ba ki la lah ban pynliem noh ïa ka Uzbekistan da 2-1 ha ka jingïakhun kaba khatduh kaba long ha kane ka sngi Thohdieng ha Dolen Omurzakov Stadium ha Bishek, Kyrgyz Republic.
Na ka liang u Myntri sorkar ka jylla, Bah Sanbor Shullai mar ïa tip ba ka kynhun ïalehkai ka India ka la wanphai sha la ka ri bad kumjuh ba kitei ki thei ïalehkai ka jylla kin wan phai iing ha ka sngi U Blei mardor u la phah pynbeit ban pdiang bad pynkup burom ïa ki ha shiteng lynti.
Ïa kane ka jingpdiang burom la pynlong ha Orchid Lake Resort kaba don ha Umïam ha kaba la wan ban sakhi lang da ki bahaiing ha sem jong kine ki arngut ki nongïalehkai ryngkat u Bah Sanbor kum u Kongsan bad Bah Wallam Khongwir uba pynbit pynbiang ïa kane ka jingpynkup burom.
Ha kane ka jingpynkup burom, u Bah Sanbor u la ong ba ka long ka burom kaba khraw ïa ka jylla Meghalaya watla kadei ka jylla kaba rit hynrei ka la lah pat ban sei haduh arngut ki thei ïalehkai ba kynsai ban mihkhmat ïa ka ri India ha ki jingïalehkai barri.
Kum u nongmihkhmat paidbah u la aiti ruh da ka song pisa kaba mar 50,000 tyngkasha kine ki arngut nalor kiwei kiwei ki jingai sngewbha.
Ha kajuh ka por u la pyntip ruh ba u la dep ban kren bad u Myntri Rangbah, nangta ïa u Symbud Myntri Rangbah kumjuh ïa u Myntri ka tnad Sports haba ïadei bad kane ka burom kaba ki wanrah bad kumta shen na ka liang ka sorkar jylla ruh kan sa pynkup burom lang ïa ki.
“Kum u Myntri ba mihkhmt ïa ka sorkar jylla bad kum u nongmihkhmat paidbah nga dap da ka jingsngew sarong ba ki khun samla jongngi ki la ïoh ban mihkhmat ïa ka ri ha ki lympung ïakhun kiba heh,” u la ong.
U Bah Sanbor u la pyntip ruh ba ïa kane ka 1 lak tyngka kaba u ai sha kine ki arngut kadei kaba u sei na ka Discretionary Grant kaba baroh 60 ngut ki MLA ki ju ïoh 20 lak ha ka shisnem ban ai sha ki paidbah la ka long ha ki jingjia ba kyrkieh kumjuh ha ki kam sngewbha ne kam sngewsih ruh kumjuh.
Na ka liang ka Bonfilia haba kren ha kane ka sngi ka la ïathuh ba kin ïoh ban shongthait tang kumba katto katne sngi bad hadien kin hap ban don biang pat bad ka kynhun ban kilan met na ka bynta kiwei ki lympung ialehkai kynthup ïa ka Indian Women’s League nalor kiwei kiwei. Katba na ka liang ki bahaiing ki la pynpaw ka jingsngewkmen kaba khraw ba ki la ïoh ïa kat katei ka burom kaba khraw na u Myntri sorkar ka jylla.
