Don aiu sha lyndet ka jingleh kyrkieh ka Sorkar ban pynbeit pud bad ka Assam, ong u Bah Ardent

Shillong, Iaiong 19 : U bah Ardent Miller Basawiamoit u MLA barim ka Nongkrem Constituency u la buh ka jingkylli ïa ka sorkar Meghalaya Democratic Alliance (MDA) ba ka don aiu sha lyndet ba kin leh kyrkieh ban shim rai halor ka jingïapynbeit ïa u pud u sam hapdeng ka Assam bad Meghalaya hato kan dei na ka bynta ka jingmyntoi ïa ka jylla lane ka jingmyntoi jong no.
Haba ïa kren bad u bah Ardent u la ïathuh ba ha ka 18 tarik mynta u bnai u la hiar sha ka shnong Maikuli ban shim bynta ha kawei na ki jingïalang ba la khot pynlong da ki nongïalam kane ka shnong bad sakhi ruh ïa ki jingkam thok jong ka sorkar MDA ha kaba ïa dei bad kine ki jaka kiba thmu ban ai (pung dohkha) sha Assam bad ka jaka ka ba ki thmu ban shim (Lum Jingtep) na ka Assam .
“Kat kum ka jingïathuh ki nongshong shnong ka shnong Mailkhuli ka long ba ka pung dohkha kaba la pynbeit ban ai noh sha ka Assam , ka dei ka ba la pynïaid da ki shnong Maikhuli hi bad ka jingong ba kin ai bujli noh ha ka jaka jong ka, da u Lum Jingtep ba kham heh , ka long ka ba ki la shuh thok namar ba une u Lum Jingtep ha ka shnong Maikhuli u dei ha ka jaka ka ba la dep ban register da ki bor shnong na ka jylla Meghalaya” la ïathuh u bah Basawiamoit.
U la bynrap ruh “ïa une u Lum Jingtep na ka liang ka Assam ka la wan tur jubor bad dakhol jubor ha u snem 2003 ,bad hadien ba don ka jingïapyrshah bad ka jingpynbeit para sorkar la rai ban bat ïa ka status quo, hynrei na ka liang ka Assam ki la ïaleh beit ban knieh ïa kane ka jaka ha kaba na ka liang ki bor shnong ka Maikhuli ki la ujor da ka mokotduma ha ka ïing bishar bad na ka liang ka ïingbishar ka la rai ba ka Assam kam dei ban khang ïa ki briew na ka jylla Meghalaya ba kin pyndonkam ïa kane ka jaka”.
U bah Arden u la ong ruh ba ka jingkam jong ka Sorkar MDA ba ka Assam ka la mynjur ban ai sngew bha ïa kane ka jaka ba don u Lum Jingtep sha ka jylla Meghalaya ka dei kaba shukor namar ba kane ka jaka ka dei jong ka jylla Meghalaya bad ïa kane la dep ban pynksan ruh da ka ïingbishar.
U la bynrap bad ong ruh ba ka jingkam jong ka sorkar halor ka pung dohkha ba ka dei ka jaka ka ba don tang 25000 sqft ka dei ka ba ki la shu thok pylleiñ pylleiñ namar ba kane ka pung dohkha ka dei ka ba ym duna ka jingheh kumba shilak sqft.
“Kine ki eiei ki ba la wanrah ïa ka jing bym sngewhun ïa ka jingleh jong kane sorkar ha kaba ïadei bad ka jingpynbeit ïa u pud u sam namar ba ka sorkar ka la shu leh kyrkieh ha kane ka bynta”u la ong.
U bah Ardent u la ong ruh ba wat la na ka liang ka sorkar ka pyneh ba kim kwah ban phai dien biang ïa ka ne ka jingpynbeit u pud u sam hynrei ka sorkar kadei ban sngewthuh ba kaei kaba ki leh kam dei kat kum ka lynti ba beit namar ba ym tang ki nongshong shnong kiba pyrshah ïa kane hynrei kiwei ki party kiba don hapoh ka sorkar ruh ki pyrshah ïa kane.
“Kane ka paw ba ki la shu leh kyrkieh bad ki la leh tang ban ïoh burom namar ka khlem wanrah ïa ka jingïa hun baroh arliang u la bynrap shuh shuh ba “Kat ka jingpynbeit ïa u pud u sam dei ban don ka jingïahun baroh arliang namar ka dei ka jingpynbeit ym ka jingleh da ka bor lada ka jingïahun kam don ka mut kan mih ka jingïakhih” ong biang u bah Ardent.
“Kumba ka long mynta hi ki nongshongshnong na khappud kin ym pdiang ïa kane ka jingleh jong ka sorkar bad shano kane ka jingbym hun kan ïalam tang ka por ban batai hynrei na ka liang jong ngi, ngin ym lah ban shuh ieh ïa kane bad ngin hap ban bishar shuh shuh hadien ka jingïakynduh bad ki nongshynshar shnong bad ki nongshong shnong na kane ka thaiñ, ong shuh shuh u bah Ardent.
U bah Arden u la ong ba ka jylla hi ka kwah ban don ka jingïa pynbeit noh ïa u pud u sam namar ba kane ka dei ka mat kaba la sah teng slem hynrei ka jingpynbeit kam dei ban long da ka jingleh kyrkieh namar yn ym lah ban pdiang ïa kane bad lada ki thmu ban pynbeit da ka ba thok kaba shukor kumno ki paidbah kin ai ka jingïatrei lang bad ka sorkar.
U la ong “Ngi kwah ban kylli ïa ka party NPP ba kaei ka ba don ha lyndet halor kane ka jingleh kyrkieh ban rai ïa ka jingpynbeit ïa u pud u sam ,naduh nyngkong ngim kwah ban kren eiei halor kane ka mat namar ba ngi kwah ban ai ka jingshaniah ïa ka sorkar MDA ba kan shim ïa kane ka sienjam ka ba kan pynbeit ïa kane ka mat ,kaba la sah slem la bun snem namar ba ki la shu ieh kumto hynrei haba na ki dak ki shin ki jingiam jingud ki briew na khappud kam shym la long kum ka jingïahun lang ka jingkylli mynta ka long don aiu ha lyndet jong kane ka jingleh kyrkieh”.
“Hato ka dei na ka jingmyntoi na ka bynta ka jylla lane ka don shisha kata ka eiei sha lyndet ka ba pynlyngngoh ïa u ba bun namar ba don na ki jaka ki ba khlem don ka jingïakajia ruh la shu pynngat sha Assam”u la bynrap .
“Kan dang long ka ba kloi ban ong eiei ba don aiu sha lyndet halor kane ka rai jong ka sorkar MDA hynrei kaei ka ba ïohi mynta kam long kaba beit kaba biang bad kaba pynhun ïa baroh ar liang”la ong u bah Ardent.
U la kynnoh ruh “Ka jing thung ïa ki Regional Committee ban leit jurip ban pynbiang ïa ki kaiphod ka dei tang ka jingbuh ban pyni ha kaba ka la dep don lypa ka jing ïasngewthuh jingmut hapdeng u Conrad K Sangma bad u Himanta Biswa Sarma tang ban pyni ba ki la kynthup hynrei la shu rai khlem ka jingmynjur bad khlem da sngap ïa ka sur ki nongshnong shnong ha kine ki thaiñ”.