Don aiu sha lyndet bym jubab ka MeECL ïa ka RTI u Bah Dispasing hadien 40 sngi?

Shillong, Jylliew, 20: Ka jingsngap mynthi jong u Public Information Officer (PIO) ka Meghalaya Energy Corporation Limited (MeECL), Lumjingshai, Shillong wat hadien ban 40 sngi ban ai jubab halor ka jingpan RTI jong u Bah Disparsing Rani ha kaba ïadei bad ka jingïoh tan bording jong ki briew kiba sah ha Them Iew Mawlong ka la pynsuba sniew haduh katta katta.
U Bah Disparsing Rani uba dei u nongwad RTI ba pawkhmat ha kane ka jylla Meghalaya ha ka jingïakynduh bad ki lad pathai khubor ha ka Lah Sngi u Blei u la pyntip ba ka MeECL wat hadien ba la kut ki sawphew sngi ruh kam pat lah satia ban ai jubab ïa ka RTI kaba u la pan halor kane ka mat.
Haba ïathuh bniah halor ka jingpan RTI na ka MeECL, Lumjingshai ha kaba ïadei bad ka jingïoh tan bording jong ki briew kiba sah ha Them Iew Mawlong, u Bah Disparsing Rani u la ong, ‘katkum ka jingkam jong ki Harijan ba ïa ka jaka la ai da u Syiem ka Hima Mylliem naduh u snem 1853. Halor kata ka jingkam jong ki, ka donkam ïa ki Dulir jaka ban pynshisha.”
“Ka don ka jingïasoi soskular hapdeng ka ophis u Syiem ka Hima Mylliem bad ka Shillong Municipal Board (SMB) ha u snem 1954 lyngba u Pa’iem Joiñ Manik Syiem bad u Vice Chairman ka Municipal u L. Pal. Ki don ar tylli ki Soskular ba la ïasoi hapdeng u Syiem ka Hima Mylliem bad ka Municipal. Ka jaka ka don ar tylli, katkum kito ki snem. Ka Plot-A ka don 21, 837 sq.ft bad ka Plot-B ka don 11,577 sq.ft. Halor kane ka Soskular, ki Harijan kim pdiang ïa kane bad ki ong ba ki la ïoh jaka na u Syiem ka Hima Mylliem naduh u snem 1853 bad wat ka aiñ jong ka Khasi Hills Autonomous District Council ruh jong u snem 1957 ruh kam pat lah ban treikam ïa ki bad wat ka Meghalaya Land Transfer Act, 1971 ruh ki ong ba kam treikam ïa ki namarba ki ladep ïoh ïa ka jaka naduh u snem 1853,” ong u Bah Rani.
Kum ban shu pynkynmaw, hadien ka jingïakhih kaba jur kaba la jia ha ka 9 tarik, Jylliew, 2018 ka Sorkar ka la thung da ka High Level Committee ban wad ïa ki lad ki lynti na ka bynta ban pynkynriah noh ïa ki Harijan kiba sah ha Thew Iew Mawlong.
“Ki (Harijan) la mudui ruh sha Ingbishar Meghalaya High Court pyrshah ïa ka High Level Committee ba la thung da ka Sorkar Jylla da kaba ong ba ka jingthung ïa kane ka Committee ka long be-aiñ. Hynrei ka Ingbishar Meghalaya High Court ka la pynkut noh ïa kane ka ujor jong ka Harijan Panchayat Committee namarba kim shym la leit hajir hakhmat ka Iingbishar,” u la ong.
“Katkum ka soskular 1954 ka kren shai ba lada ka Municipal ka pynkheiñ ïa kino kino ki kyndon jingïateh soskular u Syiem u la lah ban shimti biang ïa ka jaka,” u la ong.
Haba ïathuh halor ka jingpan RTI ban ïoh ïa ka jingtip kaba bniah, u Bah Rani u la ong, “naduh u snem 1853 ki (Harijan) la ïoh ïa ka jaka na u Syiem Mylliem bad kata ka paw ba ki la ïoh ïa ka Patta bad khnang ban tip shai la ki don neem ïa ka Patta, ka Soskular u Syiem Mylliem bad ka Municipal ha u snem 1954 bad lada don ka jingïasoi soskular ka paw ba ka bor (halor ka jaka ha Thew Iew Mawlong) kam dei shuh ka jong u Syiem hynrei ka dei jong ka Shillong Municipal Board.”
“Ban tip ïa ka jingshisha, nga la pan da ka RTI na ka Ophis jong ka MeECL ha ka 1 tarik, Ïaiong, 2022. Ka RTI ka long ban tip, la ki (Harijan) don kot don sla neem kiba shong ha (Them Iew Mawlong). Baroh ngi tip shwa ban ïoh tan bording ngi hap ban ai ïa ka Patta sha ka MeECL,” la ïathuh u Bah Rani.
“Nga sngewsih ban ïathuh ba mynta la ar bnai duna kam (MeECL) pat ai jubab. Nga la apil ruh ha ka 7 tarik mynta u bnai hynrei haduh mynta ruh ngam pat ïoh ïa ka jubab. Ka jingkylli ka long balei?” la buh jingkylli u Bah Rani.
U la ïathuh ruh ba ha ka jingpan RTI, u la pan jubab na ka MeECL ïa ka jinglait thylli ki kam hapoh ka Corporation, ka jingshongthait bad ka jingkiew kam jong ki nongtrei ka Corporation bad sa kawei pat ka dei halor ki kot ki sla kiba ïadei bad ka jingai bording ïa ki briew kiba sah ha Them Iew Mawlong kynthup ruh ïa ki kyrteng jong ki Harijan kiba don haduh 428 iing.