Don aiu ha lyndet ka jingbym shim khia ka sorkar pdeng ban pynbeit ïa ki kynrum kynram ha NEHU

K a North Eastern Hill University (NEHU) ka dei kawei na ki skul bah kaba la pawnam bha ha ka ri India bad kaba la sei ruh ïa ki spah bad hajar ki samla pule kiba long ki rishot jongka ri. Hynrei mynta la 422 sngi lah ïaid kane ka skul bah ka don hapdeng ka jingkynrum kynram kaba jur bad ka daw bah ka dei ka jingpyni bor jong u Vice Chancellor (VC) jong kane ka skul bah u Prof Phabha Shukla namar wat hadien ba u la ïohi ba ki Nonghikai, ki Samla Pule bad wat kiwei kiwei ki bor pynïaid ka NEHU kim mon shuh ïa u ruh u ïai pyni bor beit da kaba bat beit ïa ka shuki katba sha ophis um ju wan treikam.
Kane ka jingleh jongu ka la buh ïa kane ka skul bah ha ka jingeh kaba khraw namar ym don shuh ba peit ba pynïaid ïaki kam kiba dei ban peit bad pynïaid da u Vice Chancellor. Kaba kham pynlyngngoh ka dei ka jingleh bym suidñiew jongka sorkar pdeng ruh ym tip shuh u dei u briew uba kumno bad katno eh ba katne ka la ïohi ïa ki kynrum kynram, la leit ïakren da u Myntri Rangbah, la phah shithi da ki Seng bapher bapher sha ka sorkar pdeng, la phah shithi da u Myntri ka tnad Pule Puthi jongka sorkar jylla sha u Myntri ka tnad pule puthi ka sorkar pdeng ruh haduh mynta ym pat leh ei ei. Kane kaba pynlyngngoh shikatdei eh don aiu sha lyndet halor kane ka jingbym shim khia jongka sorkar pdeng.
Ha ka jingshisha ka sorkar pdeng haba ka la ïohi katne mih ki kynrum kynram bad ki jingpyrshah ïa u Prof Shukla ka la dei ban shu pynkynriah noh ïa u sha kiwei ki jaka bad wanrah noh da kiwei ha ka jaka jongu khnang ba ki kam ki jam kin ïaid beit hynrei kam leh satia kumta i kumba ka shu kwah ban peitkai ïa kine ki jingjia ha NEHU. Haba ki seng bapher bapher hapoh ka NEHU naduh ka NEHUTA, NEHUNSA, NEHUSU, bad KSU ki la ïohi ïa kane ka jingleh bym suidñiew jongka sorkar pdeng kim banse mynta ka sngi ki la leit ban tied jingkhang ha Raj Bhavan ban kyrpad ïa u Lat ba un bud dien noh ïa kane ka kam bad ka sorkar pdeng. Ka jingleit ïa kynduh ka long ruh ïa u Myntri ka tnad pule puthi jongka sorkar jylla ban ïakren ba un shim khia lem ïa kane ka kam namar ka la ktah da shisha haduh katta katta ïa ki jingtreikam bad jingïaid beit ki kam ki jam ha NEHU.
Kumba long mynta ym don ba soi ban ïoh siew ïa ki jingsiew ba ka NEHU ka dei ban siew naduh ki nongtrei, ki prokram bapher bapher jong ki samla pule bad kumta ter ter. Hooid ban da dei ki kam kiba ka sorkar jylla ka lah ban leh ym lah ban len tang shi sngi kane ka sorkar hapoh ka jingïalam jong u Myntri Rangbah ka jylla u Conrad K Sangma ka la dep ban leh hynrei namar ba ka hap bad ka sorkar pdeng kumta ka shem jingeh ïa ka sorkar jylla ruh. Hooid ym lah ban len u Myntri Rangbah u la shim khia ban bud dien ïa kane ka kam bad wat u Myntri ka tnad Pule Puthi ruh hynrei haba ka sorkar pdeng pat kam leh ei ei ka pynsuki pynban ïa ka kam da kaba thung jingtohkit. Hooid donkam ban thung kata ka jingtohkit hynrei ai ba ka jingtohkit kan dang ïaid bad wanrah noh da u Vice Chancellor uba thymmai ba ki kam ki jam kin ïaid beit ïaid ryntih kumba ju long baroh shi katta.
Kam myntoi ïa ka sorkar pdeng ba kan shu peitkai ne ban pynslem ei ia ka por namar kiba shah ktah ki dei ki samla pule, ki College bapher bapher hapoh ka jylla kiba pynïasoh bad ka NEHU. Ka la dei ka por ba ka sorkar pdeng kan pynkynriah noh ïa u Prof Shukla sha kawei pat ka University bad wanrah noh da uwei uba ïa mynjur bad pdiang lut da baroh khnang ba ka jingpynïaid kam hapoh ka NEHU kan ïaid ryntih biang sa shisien.