Tura, Jylliew 19 : Na ka jingshlei um ha kane ka jingther u lapbah ha ri lum Garo kiba bun ki surok ki la dkut bad twa bad hap ban pynsangeh ïa ka ïaid ka ïeng ki kali. Kawei ka surok kaba la khang ban ïaid ki kali ka dei na Purakhasi sha Ampaati lyngba ka Salmanpara namar ka la twa bad dkut ha Mibitpara. Kawei pat ka surok ka dei na Purakhasia sha Tura lyngba ka Gambegre kane ruh ka la julor jur ha ki bynta Chenggapara bad Jibalgre.
Ka surok bah ba 12 jongka jylla kata na Purakhasia sha Ampati lyngba ka Mahendraganj ruh la hap ban khang ïaid ki kali namar ka la twa bad shah rong ka jingkieng ha ka wah Darong. Nalor kata ïa ka surok ha Karonggre la hap ban khang noh hajan Dalu kaba dei ka NH 51. Kawei pat ka jingkieng dieng ha Kujikura hajan Dalu ruh kala julor jur. Uwei u diengbah ula khyllem ha pdeng ka surok ha Damalgre bad uwei u diengbah u la khyllem halor ki sainar ilektrik hajan ophis MBOSE, Tura.
Ka um ka la nang kiew ha kiba bun ki jaka ha ri lum Garo namar ka lapbah u nang jur beit ha katei ka thaiñ. Na ka liang ki bor synshar ki la kyntu ïa ki paidbah ban husiar bad kiar na ka ba leit jingleit ha kum kane ka por ba dang jur slap namar ba la jur palat ki jingtwa bad jingkhyllem ki jaka bad surok khnang ban lait na kino kino ki jingmynsaw bad jingjia ba sngewsih. Na ka liang ki bor synshar district ki la pyrshang katba lah ban pyllait ïa ki surok ban ïoh ïaid ki kali tangba u DC u kyntu jur ban ym mih na la ki ïing ki sem lada ym dei ka kam ba kyrkieh. U la kyntu ruh ban phone sha u number 112 lada don ki jingjia ba kyrkieh ne pyntip ruh sha Police Control Room, Tura 883723053 ne phone beit sha u DC ruh.
