Nongstoiñ, Jylliew, 22: Ka jingjur u slap ba khlem sangeh ka la pynkdut mynta mar shiteng ïa ka surok Nongstoiñ-Wahkaji ha ka thaiñ Nongkynjang West Khasi Hills, namar ka jingshah rong noh ka surok subway, kaba la shna ban pyndonkam shipor katba ka kompani Vozrozhdenie kaba na Russia, kam pat pyndep ïa ka jingkieng jong ka surok Double Lane.
Kane ka surok ba shah rong ka dei ka surok Subway ba la shna ban pynïaid kali shipor, namar ka jingpyntrei ïa ka surok double lane ka dang ïaid shakhmat. Kane ka surok kaba twa ka dei kaba pynïaid na ka kynroh jong ka jingkieng kaba don hajan ka Sub Centre Nongkynjang.
Kane ka surok ka dei kaba pynïasoh ïa kiba bun tylli ki shnong ka thaiñ Lai Lyngdoh bad ïa ka South West Khasi Hills baroh kawei bad ka dei ruh ka surok ba ju pyndonkam manla ka sngi da ki paidbah ka thaiñ.
Halor kane, na ka liang ka seng Federation of Khasi Jaiñtia & Garo People (FKJGP)-Lai Lyngdoh Unit, ka la pynpaw ba kane ka jingdkut ka surok subway, ka la buh hapdeng ki jingeh kiba bun ïa ki paidbah ka thaiñ, khamtam ha ka leit ka wan namar ka jingbym don lynti shuh.
Ka seng ka la pynpaw ïa ka jingsngew bynñiaw kaba jur halor ka jingsuki palat jong ka kompani Vozrozhdenie, ban pyntrei ïa ka jingkieng ha kane ka thaiñ ba twa ka surok subway.
Katkum ka jingong u President Bah Nestor Nongkseh, kane ka kompani ka la dei ban shna wut wut ïa kane ka jingkieng ban lah pyndep tang hapoh u bnai Lber. Hynrei, la kynnoh ba dei namar ka jingkheiñ sting palat kane ka kompani, mynta ka la wanrah ïa ka jingeh ïa ki paidbah ba leit ba wan man ka sngi.
U la pyntip ba kane ka kompani ka la dep ban thaiñ nar rot ïa kane ka jingkieng mynta la palat shibnai, hynrei ka la shu ieh noh khlem da pyndep ban siang dewbilat.
Ka FKJGP ka dawa ïa ka tnad PWD ba ka dei ban shimkhia mardor halor kane ka jingdkut ka surok bad ban bthah ruh ïa kane ka kompani na Russia, ba kan pynshna mardor ïa ka surok ba la shah pynjulor ha ka um slap ban lait ki paidbah na ka jingsohsat.
