Dkut ka jingkieng ïaid kali ha Lahaleiñ, kordit ki paidbah ha ka leit ka wan

Khliehriat Naitung 07: Kawei ka jingkieng ïaid kali kaba don ha shnong ha khappud ha Lahaleiñ hynnin ka sngi ka la dkhut bad pra phim bad shah rong bad ka um kaba heh bad kaba tuid lat lat ka la kit noh ploiñ ïa ka jingkieng, kane ka la buh jingeh haduh katta katta ïa ki paidbah ka thaiñ khappud, kiba ju ïaid lyngba na kane ka jingieng bad la ong ba kane ka jingkieng ka dei kaba don ha ka wah Ïakang ha katei ka shnong Lahaleiñ.
Ki kali kiba dang wan na ki jaka ïew kiba kit ïa ki briew bad ki jingkit ki la sahkut ha katei ka bynta bad kim lait shuh ban ïaid sha shiliang, mynta ki briew ki la shu shna jingkieng hi da ki dieng tylli na kawei ka jaka tang ban lait ban jam sha shiliang, ki paidbah kiba dang wan jingwan kiba kynthup naduh ki rangbah, ki kynthei ki khynnah hapdeng ka jingther u slap bad hapdeng ka jingma ki la shu ïa par bad ïaid suki suki da ka kjat na kitei ki dieng tylli ba la pun na shiliang sha shiliang, ha ryngkat ka jingsyier mynsiem ki la iaid tang ban lait sha shiliang ban poi sha shnong.
Ha kaba ïadei bad kane, u Deputy Commissioner ka East Jaiñtia Hills District, u Abhilash Banarwal, IAS hynnin ka sngi hi mar mar u la shim khia bad u la phah da ka jingthoh sha u Chief Engineer jong ka tnat Central Public Works Department (CPWD), Shillong bad u la bthah bad ban jur ba ka tnat ka dei ban shim khia noh ban maramot noh mardor ïa katei ka jingkieng kaba don ha ka wah Ïakang hajan Lahaleiñ kaba la jot bad pra na ka daw ka jinglynshop ka um ha ka por ba jur palat u slap, u la bthah ruh ïa u Chief Engineer ba u dei ruh ban pynpoi ïa ki kaiphot halor ki kam ba ki leh ban ba kin sa leh ha kaba ïadei bad ka jingmaramot ïa katei ka jingkieng ha khappud.
U General Secretary jong ka Joint Action Committee jong ki Saw Dorbar Shnong na thaiñ khappud, u bah Raja Suchen, u la ïathuh ba mynta ki paidbah ka thaiñ khappud ki la ïakynduh jingeh haduh katta katta ha ka leit ka wan, ha ka kit ka bah namar katei ka jingkieng ka la shah pynjulor ha ka um saw kaba lat lat kaba la kit noh ïa ka jingkieng baroh kawei, la ong ba na ka liang u bah Raja u la khot ïa ki nongtrei jong ka tnat Public Works Department kiba don ha shnong Hingaria ba kin sngewbha ban wan ïarap lem hynrei haduh kim shym la wan satia, na ka liang jong u kyntu jur bad khmih lynti ba ki bor district bad ki bor ba dei peit kin sngewbha ban shim khia lem ban peit lem ïa ki jingeh jong ki paidbah ha ki thaiñ khappud kiba ju ïakynduh jingeh khamtam eh ha ka leit ka wan na ka daw ka jingdkhut jingjulor ki jingkieng.
Kum ban shu pynkynmaw, kawei ruh Ka jingkieng ( RCC Bridge No 54/1), kaba don ha ki thaiñ khappud hajan ka shnong Shymplong ruh ka lah shah rong noh ha ka um myn ha ka 17 tarik u ïaïong ïa kane ka jingkieng ruh haduh mynta ym pat shym la shna bad kane ka jingkieng ruh ka dei kaba pyniasoh ïa kiba bun bah ki shnong ha ki thaiñ khappud ha East Jaiñtia Hills District.
Ki nongshong shnong jong ka shnong Shymplong bad ki shnong ba mar jan ki iathuh ba lada ki donkam bad leit sha Khliehriat, sha Umkiang ki hap ban iaid da ka kjat na kawei ka jingkieng ïaid kjat (Hanging Bridge) kaba don ha ka wah Lukha tat haduh ba kin da poi ha surok national highway ha Sonapyrdi, la ong ruh ba naduh ba julor katei ka jingkieng ym don kali shuh ki ban wan bad leit sha ki shnong khappud kiba dei ïaid lyngba na katei ka jingkieng.