Shillong, Nailur, 06: U Bah JA Lyngdoh ha ka sngi Baar u la dkhat noh ïa ka jingïadei bad ka Bharatiya Janata Party (BJP) Meghalaya State Unit da kaba ai daw ba ula shah ieh sharud, sha i beiñ bad shah kyntait ha ki nongïalam jong ka Party ha ki saw snem shiteng ba la leit noh.
Ha ka shithi iehnoh ba la phah sha u State President ka BJP u Bah Ernest Mawrie, u Bah JA Lyngdoh u la pynpaw ba naduh ba u la pynïasoh bad ka BJP ha u snem 2016, u la trei shitom na ka bynta ban kyntiew ïa ka party.
Ha u snem 2018 u Bah Lyngdoh u la ïakhun ïa ka elekshon sha ka Ingdorbar Thawaiñ na ka North Shillong Constituency na ka tiket jong ka BJP bad shah rem tang khyndiat vote ha u MLA ba mynta u Bah Adelbert Nongrum.
“La tynrong ha nga ïa ki kam kiba jwat da u Nalin Kohli bad u Ram Madhav ban leit khroh ïa ki Sitting MLA ba pawkhmat ban pynïasoh bad ka BJP shwa ha ka elekshon 2018 bad nga la aiti met bad mynsiem katkum ha ka bor barit lajong ha kaba saw ngut ki Sitting MLA kiba kynthup ïa u Bah Sanbor Shullai, u Bah A. L Hek, u Bah Robinius Syngkon bad u Bah Justin Dkhar ki la pynïasoh bad ka BJP. Hynrei kiei kiei ki jingjia kiba dang shen ki la pynlong ïa nga ba nga hap ban iehnoh ïa ka jinglong dkhot hapoh ka party,” la pynpaw u Bah Lyngdoh ha ka shithi ba la phah sha u State President ka BJP.
Shuh shuh, u la bynrap ba ki don ruh bun ki daw kiba la pynlong ïa u ban shim ïa kane ka rai.
“Hapoh ka jingïalam jong phi kum u President jong ka party, nga sngew ba nga la shah shet kylla. Ka sakhi kaba paw shai namarba phi kham noh ka mon sha u Bah Rocky Hek kum u kyrtong ka party na North Shillong Constituency hadien ba nga la shah rem. Na ka por sha ka por, nga la shimkhia ban ïakynduh bad ban ïakren bad phi hynrei phim shym la shimkhia. Hadien ba u Bah Rocky Hek u la mih noh na ka party mynta u snem nga la pyrshang ban ïakynduh bad phi hynrei kam shym la poi shaei shaei ruh,” u la ong.
Hadien ka jingphet noh jong u Bah Rocky Hek, ka BJP ka la pynpaw ba ka kham noh sha u Bah Martamlin Pyrbot ban pynieng kum u kyrtong na North Shillong Constituency ha ka jaka ban ai tiket ïa u Bah JA Lyngdoh.
Kum ban shu pynkynmaw hangne, u SP barim ka East Khasi Hills u Bah Mariahom Kharkrang ha ka 3 tarik mynta u bnai u la pynïasoh ïalade bad ka BJP. Ha kajuh ka por u la pynbna ruh ïa ka jingthmu jong u ban ïakhun na North Shillong Constituency ha ka elekshon ka ban sa long ha u snem 2023 ha kane ka jylla.
