Diaw mynsiem kiba duna dkhotmet bym biang ka leit ka wan ha surok bad kiew kali
Phah kyrwoh sha ka tnat PWD bad MeECL
Shillong, Rymphang, 18: Ki briew kiba don jingduna ha ki dkhotmet ha ka sngi Thohdieng ki la pynpaw ïa ka jingdiaw mynsiem haduh katta katta halor ka jingbym biang ka leit ka wan ha nongbah Shillong bad khamtam ban kiew kali haba leit jingleit shane shatai.
Khnang ban pynsngew ïa kane ka jingeh sha ki tyndong skhor jong ka Sorkar Jylla ki briew kiba duna dkhotmet ki la pynlong da ka jingïasoi paidbah ha Khyndai Lad, Shillong.
U Managing Director jong ka Blind Lead Trust Organization (BLTO) u Jitendra Dkhar u la ïathuh ba ka jingpynlong ïa kane ka jingïasoi paidbah ka long ban dawa ïa ka Sorkar Jylla ba kan pynsuk ïa ki briew duna dkhotmet kum ha ka por kiew kali bad ym tang katta kane ka jingdawa ka long ruh ban pynsuk ïa ki riewtymmen, ïa ki longkmie kiba armet bad ïa kiwei kiwei de kiba ïakynduh jingeh ha ki jingim briew.
U Bah Dkhar u la ong ruh ki briew kiba duna ha ka bor ïohi jong ki khmat ki ju diaw mynsiem haduh katta katta haba ïaid lynti ha surok na ka daw ka jingbym biang ki lynti ïaid kjat bad ka jingbun ki thliew ki syar kaba buh pat ïa ka jingim jong ki ha ka jingma.
Ha ka jingpynlong ïa kane ka jingïasoi paidbah la ïashim bynta lang da ka Meghalaya Deaf Association, ka Khasi Disabilities Association, ka Meghalaya Liberation for Visually Impaired, ka Barefoot Trust, ka National Center for Promotion and Empowerment of Disabled People.
U President ka Khasi Disabilities Association u Bah Starwin Kharjana u la ong ba haduh mynta ki jaka pynieng ïa ki Wheel Chair na ka bynta kiba duna dkhotmet ki don tang ha ophis Secretariat, ha SP Office bad ha Ophis ka MPSC hynrei ha kiwei kiwei ki Ophis treikam ka Sorkar ym shym la shna satia ïa kine ki jaka pynieng ïa ki Wheel Chair.
U la ong ruh ba ka lad jingïarap na ka Chief Minister Social Assistant ka Sorkar ka la nang ïai siew ïa ka baibam sha kiba duna dkhotmet hapoh ka jylla baroh kawei. “Ngi kyrpad ïa ka Sorkar ba kan pynkiew noh ïa ka jingsiew baibam namarba kumba ngi tip mynta kiba duna dkhotmet kiba ladep ban pule ïa ka Class-X ki ïoh ïa ka Unemployment Allowance shi hajar tyngka shi bnai bad baroh shikatta ki ïoh lang ïa ka song jingïarap CMSA kaba T.500 shi bnai. Ngi ïoh shithi na ka Child Development Project Officer (CDPO) kaba la tyrwa ïa ka Unemployment Allowance kaba T.1000 lane ka CMSA kaba tang T.500. Kane ka khanglad jong ngi haba ngi la pyndep ïa ki jingpule bapher bapher,”la ong shuh shuh u Bah Kharjana.
“Ka long kaei kaei kaba pynsngew sih haduh katta katta bad ngi la nang pynkhreh ïa ka mat ban sa ïakren ha ka jingïalang ban shim rai halor ka jingleh kyndit jong ka Sorkar ha kaba ïadei bad ka jingtyrwa ban jied tang ïa kawei ka baibam ym shuh ar tylli kumba ju long,” la ong u Bah Kharjana.