Nongstoiñ, Ïaiong, 30: Ka jingdon jong ka Community Health Centre ha Mawthengkut ha kine ki sngi imat kam don jingmut shuh, namar bun ki paidbah khamtam eh kiba pang ba shitom bad donkam jingiarap kyrkieh, ki ïakynduh shibun ki jingeh na ka daw jong ka jingduna Doctor ha katei ka jaka sumar, namar haduh mynta don tang uwei u Doctor sorkar bad uwei u Doctor Ayush.
Katto katne ki nongshong shnong ki bym kwah ban pynpaw kyrteng ïalade haba pyntip ha u nongthoh khubor, ki la ong ba haba leit shim dawai na katei ka jaka sumar hap ban ieng laiñ da ki bun kynta. Haba la leit ban jurip ïa katei ka jaka sumar, la lap ba ki nongwan shim dawai ki duna haduh katta katta bad ki don tang kumba katto katne ngut kiba wan ha katei ka jaka sumar.
Halor ka jingduna Doctor ha katei ka jaka sumar la ïoh ban ïakren bad u bah S.Rynñiaw, u la ong ba na ka por sha ka por ki sengbhalang kiba treikam hapoh Mawshynrut ki la leit ban ïakynduh ïa ki heh sorkar ban dawa ba kan pynbiang Doctor ha katei ka jaka sumar, hynrei haduh mynta ka sorkar kam shym la sngap satia. U la ong ba naduh ba ka Doctor C.Sangma ka la shah pynkynriah noh na katei ka jaka sumar, ki paidbah kiba pang ba shitom kim da kham sngew tynnad shuh ban leit phah sumar ha katei ka CHC.
La ïoh ban ïakren ruh bad ki nongshong shnong ha katei ka thaiñ, ha kaba ki la ong ba lada la sorkar kam pynbiang ïa ki Doctor ha katei ka jaka sumar, ki paidbah kim sngew myntoi satia ban leit namar naduh ka rukom check ïa ki nongpang ruh kam biang nalor kata ka rukom ai dawai ruh kam biang.
Ki la kam ruh ba haba leit phah check up, ki shu kylli ia ka jingshitom bad sa ai da ki slip ban leit thied na shabar. Lada ka long kuntei kam don jingïapher lada shu leit sha ki Pharmacy ruh namar ka long mar katjuh. Ha kajuh ka por ki la ong ba ha kine ki sngi lei lei naduh ba ki don ki nongtrei ha katei ka jaka sumar kiba la ïabit ïa u khñiang jingpang Covid 19, bun ki paidbah kim kwah satia ban leit shah sumar namar ki sheptieng.
Haba ïakren bad u bah Sranly Rongrin President ka HYC Mawshynrut Circle, u la kubur ba ka long kaba shisha ba ki don shibun ki jingduna ha katei ka jaka sumar. U la ong ba ka la donkam ba ka sorkar kan phah Doctor biang sa kumba ar ne lai ngut, namar haba phai sha ka jingdon briew ha katei ka thaiñ ka la palat ïa ka lai phew hajar ngut. Kumta lada ki Doctor ki duna, kan buh ïa kiba pang ba shitom ha ka jingeh kaba khraw.
