Shillong, Nailar 01 : Ki nongïalam jong ka United Demcratic Party (UDP) ki la pynpaw ïa ka jingsngewdiaw hadien ba ki la ïohi ba u Bah Embhah Syiemlieh, MLA barim ka UDP na Mawlai ryngkat ki nongïalam jong ka party na katei ka constituency ki la phet noh na ka party ha kane ka sngi Thohdieng ba la dep.
Halor kane, u President jong ka UDP East Khasi Hills, Bah Titos W Chyne u la ong ba na ka liang jong u mardor u la ïakren bad kiwei pat ki nongïalam jong ka party halor katei ka bynta.
“Nga la ïakren bad i Bah Embhah shwa ba in shim ïa ka rai namar kadei ka rai kaba dang lah ba pynbeit namar kadei ka kam party ym ka kam shimet jongno jongno. Watla katta ruh ngi dang don jingkyrmen bad nga la dep phone bad u General Secretary jong ka party ban pynbeit ïa ka jingïakren bad nga tharai ba i Bah Embhah ruh i kloi ban wan sha ka miej jong ka jingïakren,” ong u Bah Titos.
Shuh shuh u kubur ba katei ka jingmih jong u Bah Embhah kan ktah namar u para jong u, uba bat ïa ka kam President jong ka Shillong City Youth Wing u la mih lang ryngkat bad u hynmen nalor ki paralok kiba ïajan bad ïatrei lang. U ong ruh ba lada mih uno uno u nongïalam khamtam haba u la dei teng u nongmihkhmat kan ktah beit ïa ka party.
“Kumta na ka liang jongnga, nga sngew ba ïa kane ka kam dei ban shimkhia bad ban pynbeit noh mardor.”
