Dheng kali shipor ha surok HN ha Sonapyrdi na ka daw ka jing twa ki maw hajan ka Tunel

Khliehriat Jylliew 7: Shipor, kumba khyndiat kynta ka la don ka jingdheng kali bad thut ka jingiaid ki kali ha ka surokbah national highway ha Sonapyrdi ha jan ka jaka ba don ka tunel na ka daw ka jinghap ki maw nalor ki lum ha ka wahduid bad ha surokbah kiba la kah lynti ïa ki kali, la ong ba kane ka la jia hynne dang step ha ka por kumba 4 baje mynstep.
Ki thymmei khubor ki iathuh ba ka jingpoi ki dieng ki maw sha surok bah national highway ka dei namar ka jingther jur palat u slap ha kaba ka wahduid kaba don harud surok ka la dap bad shlei na kata ka daw ka um ba bad ki maw ki la sahkut ha ka thliew jong ka wahduid na kata ka daw ka um ba lat lat ka la rah ïa ki dieng ki maw shaduh surok bah hajan ka tunel ha Sonapyrdi.
Dei lyngba ka jingshim khia ki nongtrei jong ka National Highway Authority of India kiba la pynpoi mar mar ïa ki puh shilum kumta la lah ban pynkhuid noh kloi ïa ki maw kiba don ha surok bad tang hapoh ki kyndiat kynta ka surok ka la khuid (clear) bad ki kali ki la lah ban iaid lyngba.
Na ka liang ka tnat pulit jong ka East Jaiñtia Hills District ka buh ka jingkyntu ïa baroh kiba ñiah kali kiba iaid lyngba na ka surok national highway na Narpuh ba ki dei ban long phikir bad adkar bha, ban nym pyn her stet than ïa ki kali.