Nongstoiñ, Naiwieng 24: Ka jingjia shah siat ïap ha Mukroh West Jaiñtia Hills, ka la wanrah ïa ka jingkhih win kylleng ki jaka bad ka la pynlong ruh ïa ka synjuk ki nongkit umphniang petrol na Assam ban sangeh kiew sha Meghalaya namar ka jingbym shngaiñ.
Hynrei, kane ka jingsangeh wan pynpoi umphnïang ka synjuk, ka la ktah pat ïa ki paidbah ka Jylla, ha kaba tang ha sor Nongstoiñ ka la don ka jingeh kaba khraw namar haduh ka por janmiet ki petrol pump ki la sdang ban thylli lut.
Ka la don ka jingblok kali kaba jur bha ha sor Nongstoiñ, namar ki kali naduh ka por 2 baje janmiet ki la ieng laiñ ha ki petrol pump ban theh umphniang. Kane ka la wanrah ïa ka jingdheng kali kaba jur bha bad ka la ktah ïa ka leit ka wan ki paidbah, khamtam kito kiba hap ban ïabeh leit phai sha la ki shnong ki thaw.
Lah ban ong ba lada kane ka jingsangeh pynpoi petrol bad diesel kan neh sa katto katne sngi, kan wanrah ïa ka jingeh kaba khraw bha ïa ka leit ka wan ka kit ka bah. Lah ban ong ruh ba kan don ka jingkyrduh wat ha ka bam ka dih ruh lada ka jingkhih win kan dang neh bun bun sngi.
