Dheng kali bun kynta ha surok NH-6 Sonapyrdi ba jyrsieh na ka daw ba twa khyndew hajan Tunel

Khliehriat jymmang 27: Na ka daw ka jingtwa khyndew nalor lum, ka la wanrah ïa ka jingjyrsieh kaba jur bha ha surok National Highway-6 ha Sonapyrdi, hajan ka tunel, kane ka la jia mynne mynstep ha ka por kumba 6 baje mynstep na ka daw ka jingther u slap.
Ka jingdheng kali ka la neh bun kynta naduh ka por 6 baje mynstep bad dei haduh ka por kumba 12 baje mynsngi ki kali ki la lait ban iaid suki suki, kane ka la wanrah ka jingthut ha ka leit ka wan ha kane ka surok national highway ha ka thaiñ Narpuh, East Jaiñtia Hills District.
Na ka liang u President jong ka Khasi Students Union Narpuh Circle, u bah K.S.Suchiang, u la pynpaw ka jingsngew khia namar ka jingpynieng (parking) ki kali halor ka jingkieng wah Lukha bad kiwei kiwei ki jingkieng kiba don ha ka thaiñ Sonapyrdi ha ka por ba dheng kali na ka daw ka jingtwa khyndew, u la ong ba kane ka jingieng ki kali, kan wanrah ïa ka jingsynjor bad tor ki jingkieng bad ïoh kin julor pynban ki jingkieng, kumta u la kyntu jur ïa ki pulit pyniaid kali ba kin sngewbha ban nym shah shuh ïa ki kali ba kin ieng halor jingkieng ha ka por ba jia ka jingdheng kali.
U la ong ruh ba na ka liang ka seng ka la ju pynsngew ïa kane na ka por sha ka por ban nym shah ban ieng kali halor jingkieng, hyrei ym don ma sngew ïa kane bad kane ka jingieng laiñ ki kali halor ki jingkieng ka jia beit haba don ka jingdheng kali ha ka surok NH-6 ha katei ka thaiñ.