Khliehriat, Naitung 01: Na ka daw ka jingtwa ka surok nationa highway ha Lumshnong East Jaiñtia Hills District bad ka jingtuid lynshop ka um kum ka kshaid nalor ki lum ka la don ka jingdheng kali kaba da ki bun kynta ha ka thaiñ ha kaba baroh ki kali kynthup ki kali heh bad ki kali rit ki la sahkut haduh ba kim lah shuh ban iaid, ka jingdheng kali ka la jia naduh ka por mynsngi.
Ki thymmei khubor ki iathuh ba ïa ki kali kiba wan na ka thaiñ Khliehriat la pynphai biang sha Khliehriat bad ki kali kiba wan na ka thaiñ Malidor la pynphai biang has rum, sha Malidor, ki don ruh ki kali kiba dang ieng ha surok kiba dang ap ba kan hiar ka um bad kan da kham duna ka um kaba tuid lynshop ba kin ioh ban ïaid.
La lap bad sakhi ruh ba ka surok national highway ha East Jaiñtia Hills District ka la dap um shaduh surok kata ha Mynkre, ha Umtyra bad ha kiwei kiwei ki jaka kane ka la buh jingeh ïa ki kali khamtam ki kali rit kiba iaid ha surok, na ka daw ka jingdap um ha surok ka la wanrah ïa ka jingthut ha ka leit ka wan jong ki paidbah bad ka wanrah ka jinghdeng kali ha ki jaka ba dap um ha kaba kiba ñiah kali ki hap ban ap haduh ban da hiar ka um.
