Shillong, Ïaiong 10: Ka Sorkar Jylla kala dep ban lilam ïa palat 19000 metric ton u dewïong bala ai jingmynjur da ka National Green Tribunal ha u bnai Lber 2020.
Une u dewïong u dei shibynta jong ka 2 lak metric ton u dewïong bala ai jingmynjut da ka NGT, ong ka tyllong khubor haba pyntip ba ka Tnad Mining & Geology kalarai ban pynïaid biang shakhmat ha kaban lilam sa 1.10 lak MT u dewïong bad ang sah.
Ka jingslem ban lilam bad shalan ïa une u dewïong bala dep mynjur ka dei namar ka daw ka jingshimpor palat ka jingpynkit ïa u dew iong na ki par sha ki depot jong ka Coal India Limited.
Kawei pat ka daw ka dei namar ba ki nongtih par ki sngew ba ka dor bala buh ban shalan ïa u dewïong kam long satia kaba pynïohnong ïa ki.
“Haba khate noh 10% kaba dei ban ai sha ka Coal India Limited bad ka khajna sha ka Sorkar Jylla, ki trai dewïong kin ïoh tang kumba T. 1400 shi ton” la ong ka khubor.
Kat kum ka tyllong khubor, ka dor bala buh ïa u dewïong ka long tang T. 2300 haba ianujor pat bad ka dor iew ka kot sha ka T. 3000 -T. 4000 shi ton.
Ha u Lber 2020, ka NGT Committee kala mynjur da ka pilot basis ban lilam haduh 2 lak MT na ka 32 lak MT u dewïong ha ka Jylla. Kane ka long kat kum ka hukum jong ka Ïingkashari Supreme Court ba pynmih ha ka 3 tarik u Naitung jong u snem bala lah.
Napdeng kane, 75000 MT u dewïong u dei na East Jaiñtia Hills, 50000 MT na West Khasi Hills, 25000 MT na South West Khasi Hills bad 50000 MT na South Garo Hills.
Ka Jylla kala khmih lynti ban ïoh ïa ka khajna kaba kot haduh T. 20 klur na une u dewïong ba 2 lak MT bala mynjur katba T. 500 klur na ka jingshalan ïa u dewïong ba 32 lak MT.
