Dei u nongpyrsad ba tbit ba pyllait ïa i heprit na ka jingbam duh ka ding elektrik ïa ka met

Shillong, Jylliew 14: I Heprit Ibapynhun Ïawphniaw iba la duh ei ïa ki artylli ki kti namar ka jingshah thang ha ka ding elektrik ha ka por ba i kum ktah ïa u Transformer, i la shu lait na ka jingshah bam duh ha ka ding dei namar ka jingsumar uwei u rangbah uba don ka sap ban sumar ïa kiba pdung ding tang da kaba shu pyrsad bad tah da ka umphniang.
U Bah Alfred, uba shong ba sah ha Mawlyndep, Nongstoiñ, ba ki paidbah ki ju khot ieit u Bahduh, u la ïathuh ba ha ka por ba wanrah ïa ine i heprit ha ïing jong u, ki kti bad ki jingmynsaw ki dang jur bha bad ine i heprit in nang thiah nang dem bad im bam im dih ruh, namar ka jingtyrha ki kti na ka jingpdung ding. Nalorkata ruh ki bynta ba pdung ki la sdan long pyut bad sma iwtung bha, namar ka jingsumar da kiba bun ki jait dawai.
Hynrei hadien lai sngi ba u lai sngi ba u la sumar, ine i heprit, ka ding ka la sdang ban ïap, ka jingtyrha ka la sdang ban duna bad i la bam la duh bad ïoh thiah bad sdang ruh ban ïalehkai. Nangta shuh shuh u la ïathuh ba ka kti ba pdung naduh tyrpeng haduh tymbuit ruh ka la sdang ban dap doh. Tangba ki bynta kiba shapoh te kim long shuh, namar ba ka shyieng ruh ka la tyrkong lut bad ym don don shuh.
“Ngam sumar da kaba tah kynbat, hynrei nga shu pyrsad bad tah da ka umphniang, kaba dei ka sap kaba nga la ïoh na i Pa naduh u snem 2014”, la ong u Bah Alfred.
U Bah Alfred u la ïathuh ba u la sumar ïa ki briew kiba pdung ding la bun ngut bad lai ngut ne kine, kynthup ïa ine i heprit kidei kiba shah bat ding elektrik, tangba um ju oh dor, namar kam dei ka kam kaba u im ja, hynrei bun kiba shah sumar ha u, ki shu ai sngewbha katba ki lah. “Ngam don dukan ne jaka sumar kyrpang, namar nga dei uba im trei bylla, hynrei nga shu sumar ha ïing kat kiba wan”, u la ïathuh.
U Bahduh u la ïathuh ba donbok ba u la ïoh ban sumar ïa ine i heprit ha ka por ba dang biang, hynrei te ban da kham slem, ka ding ne ka jingpdung ka la par baroh kawei ka met bad ine i hepriti lah ban ïap ruh, namar ba ka jingpdung ka la sdang ban pur sha ki kjat ruh.
Mynta ba la poi ha NEIGRIHMS, u Bah Alfred u la ïathuh ba ine i heprit i la lait na ka jingma haba la khet noh ia ki kti jong i.
Na ka liang ka Sur u paidbah West Khasi Hills ka la ai burom ïa u Bah Alfred da kaba ai sngewbha daka pisa namar kane ka jingsumar ei jong u ïa i heprit Ibapynhun.
Ha kajuh ka por, mynta ka sngi, ki nongïalam ka Sur u paidbah West Khasi, mynta ka sngi ka la leit ban aiti ïa ka pisa kaba ka la lum na ki paidbah Nongstoiñ ha kine ki taïew baladep. Ka pisa kaba la mih palat 38 hajar tyngka, la aiti ha ki kmie ki kpa jong ine i heprit ha NEIGRIHMS.
Mar ïa rung ha kamra ba thiah ine i Khunlung, baroh ki nongïalam ka Sur ki Nong West Khasi, la ïohi ba ki la jaw umat jrup,khamtam ha ka por ba ine i Khunlung i ïam.
Na ka liang ki nongïalam, ki la ai khublei ïa ki paidbah kiba la ïasnoh ktilang ban bad kane ka kynhun kaba la treikam lyngba ka Whatsapp Group ban ïarap ïa kane ka longïing.
Ha kajuh ka por ki la dawa ruh ba ka MeECL kadei ban siew bai luksan na ka bynta ine i khunlung bad ban ai ruh ka jingïarap kaba neh junom, namar kam dei ka jingbakla jong i, hynrei kadei ka jingleh thurmur ka tnad treikam kaba khlem ker ïa u transformer haba ka buh ha ka shnong Mawkohphet, South West Khasi Hills District. Ka la dawa ruh ba dei ban ker lut ïa baroh ki transformer kiba buh ha ka jylla, khnang ba kiba kum kine ki jingjia kin nym jia shuh.
Kaei kaba i sangsot ïa kane ka jingjia ïa ka longïing i Kong Katbina ïawphniaw bad Bah Synsharlang Syiemlieh, ka long ba ki hap ban ap baroh arngut ïa ine i khun jong ki ha NEIGRIHMS bad hap ban wan ïalam lang ïa iwei i khun kynthei ba dang 5 bnai ban sah lang ha Hospital, katba ki arngut ki khun jong ki kiba kham heh ki sah sha shnong bad kiba haïing hasem.