Shillong, Nohprah 15 : U MLA barim ka Mawsynram, Bah HM Shangpliang ha ka sngi Palei u la ong ba ka jingsam khaw ei da ka sorkar pdeng ba ïalam da ka BJP ha ka por ba wan ka khlam COVID ka la neh sah ha ka jingkynmaw jong ki nong Mawsynram kiba haduh mynta mynne ki dang khot beit da u khaw Modi.
Haba kren bad ki lad pathai khubor hadien ka jingïalang bad ki heh BJP, utei u MLA barim u la pynshai ruh ba ka daw kaba u mih noh na ka TMC bad poi sha ka BJP kadei halor ka nongrim bad ka sur jong u paidbah ba pynjop ïa u ha u 2018.
“Ki paidbah kim pdiang satia ïa ka TMC ha ka constituency jongnga watla nga pyrshang katno katno ruh ban pynsngewthuh. Hynrei, ki la ai jingmut kylla ba ka khambha ban leit sha ka BJP, ka party kaba ïarap ïa u duk u suk ha nongkyndong. Ki paidbah ha constituency jongnga ki sngewthuh haduh katno u Prime Minister Modi u la ïarap ïa ki ha ka por ba wan ka khlam Modi da kaba sam ei ïa u khaw ha man la ki longïing bad kumta haduh mynta ki khot beit u khaw Modi. Dei ma ki hi ba wan kyrpad ïanga ba nga dei beit ban pynïasoh sha ka BJP,” u la ong.
Kumban shu kdew hangne, u Bah Shangpliang uba jop na ka Congress ha u 2018 u la pynïasoh pat sha ka TMC ryngkat bad ki 12 ngut kiwei pat ki MLA ha ka jingïalam jong u Dr. Mukul Sangma.
Da kaba kam ba ka jingpynïasoh jong u sha ka BJP kadei beit ha kyrteng ki kam pynroi kiba bun ba ka constituency jong u ka donkam, da kaba ong ruh ba haduh mynta ki suork na ka PMGSY ki khlem poi lut sha ki shnong ba kyndong tam bad dei na kane ka daw u thrang ban pynpoi lut ïa ki lynti syngkien ha baroh ki nongkyndong ha kine ki san snem ban wan.
“Ngi kwah ruh ban wanrah ïa ki Medical bad Engineering Collge ha kaba ki samla ka jylla kin ïoh ïa ka lad ban pule doktor bad engineer ha ka jylla la jong ha ka jaka ba kin leit shabar jylla. Ngi kwah ruh ban ai ïa ki ïing ki sem kiba biang na ka bynta ki duk ki suk bad ruh ka umbam umdih kaba paka namar haduh mynta ka JJM kam pat lah ban pynbiang lut,” u la ong da kaba bynrap ba nalor kine donkam ruh ki skul sorkar kiba paka bad ruh ki jaka sumar kiba biang jong ka sorkar.
