Dei u Dristi Rajkhowa heh ka ULFA (I) uba pynkha roi biang ïa ki kam pyntriem ha Garo Hills

Shillong, Iaiong 15 : U Myntri Rangbah ba rim ka jylla uba long ruh u Nongïalam ka liang pyrshah ula kynnoh ba ka sorkar kam shym la shim khia ban bud dien ïa ka jingjyllei ki kynhun ba pyndonkam da ki suloi Automatic kiba khlaiñ bor namar kine ki lah ban dei ki dkhot ba la pyntbit da u Dristi Rajkhowa uba dei u Commander- in- Chief ka United Liberation Front of Assom -Independent (ULFA) I, shwa ba un pyndem hakhmat ki pulit jongka South Garo Hills. Kumba ka long hi la suba ba u dei une ruh uba pynkharoi biang ïaki kynhun bad kam pyntriem ha ri lum Garo.
“ Nga la maham halor ka jingïaid jingïeng bad rieh tngen jong u Dristi Rajkhowa ha ri lum Garo bad kumno ruh ba u pynrung dkhot ïa ki samla. Hadien kane tang katto katne sngi ula leit pyndem shisha hakhmat ki pulit jongka South Garo Hills. Hynrei lada bishar bniah pat katno ngut kiba pyndem ryngkat bad u, ym don lait noh tang ma u bad arngut ki nongbud jongu katba u la dep pynrung dkhot la bun ngut bha ha ri lum Garo” ong u Dr Mukul.
Nalor kata u la ong biang “ Hato u wan pyndem bad ki tiar ïaleh kiba khlaiñ kum ki Automatic suloi bad pistol, hato phi pyrkhat ba une u nongïalam ka ULFA -I um don ki tiar ïaleh kiba biang bad u nalor ba u dei u nongïalam. Ka jingkylli ka long shaei ki tiar siat kiba tbit u buhrieh? Ka sorkar kam shym la shim khia ban tohkit bad bud dien ïa kane. U la ieh shadien ïa kiba bun ki samla kiba shu ïaid shiphang sha Garo Hills bad shiphang sha South West Khasi Hills ryngkat bad ki tiar ïaleh kiba u la ai ïa ki”.
Ha kaba ïadei bad kito ki samla kiba la kloi ban ïehnoh ïa ki kam kieng atiar bad wan sha ka miej jingkren ïasuk, u Dr Mukul u la ong “ Phi tip katno ngut kiba la leit phai biang sha khlaw? Ka sorkar ka la dei bad bud dien bad wad ïa kine ba kan tip kaei kaba la jia. Ki don bun kiei kiei kiba la jia bad kiba buh biang ïa ka jylla haka jingma”.
U la kren bynniaw ruh ïa ka jingbym shim khia jongka sorkar haba pashat jingtip lem halor kine ki jingjia “ Ka jingbym don ka jingsngewthuh ïa ki jingeh kiba mih na ki kam kaikhlaw, lehnoh bad ki kynhun pyntriem ka dei kawei na ki daw. U la pynkynmaw balei ba ka jylla Meghalaya ka kloi bha ban mih ki kynhun kieng atiar ka daw ka long ba ka dei kum ka jaka pdeng hapdeng ka Assam bad Bangladesh. Ka don ki bynta khappud kiba jrong bad ka Bangladesh bad kiba suk ïa ki kynhun kieng atiar ban pynlong ki jaka ïaid lynti haba rung ba mih na Bangladesh. Kiba bun ki kynhun kieng atiar kane ka thaiñ ki pynlong ïa ka jylla Meghalaya kum ka lynti ïaid jongki sha Bangladesh kumta lyngba kine ki ïoh ban pynbiej ïa ki khun samla ka jylla ba kin seng ïa ki kynhun kieng atiar. Kane ka dei kaba ka jylla ka la dep ïaid lynti bad kaba dang buh ruh haduh mynta haka jingma.