Shillong, Naiwieng 08 : U Symbud Myntri Rangbah ka Jylla ba peit ïa ka tnad Kampohiing, Bah Prestone Tynsong u la ong ba jingïoh kem ïa ki san ngut ki briew kiba donkti ha ki kam dawa pisa kam dei satia ka jingshisha ba ka Garo National Liberation Army (GNLA) ka la mih pyrthei biang kum ka Garo National Liberation Army Regroup (GNLA-R).
Kumban shu kdew hangne, dang shen ki pulit ka South West Khasi Hills na ka Ranikor Police Station ha ryngkat ka jingïatreilang bad ki Special Cell jong ka Mawkyrwat Police Station ki la ïoh ban kem san ngut ki briew kynthup ïa uwei uba dang khynnah halor katei ka kam dawa pisa.
“Kam dei satia ka jingshisha ba kane ka kynhun (GNLA) ka la mih pyrthei biang. Ki dei tang ki kynhun runar kiba leh ïa ki ka runar bad kam bymman. Mynta ngi la shimkhia ïa kane bad yn ym ailad satia ïano ïano ruh ban tam pud,” ong u Symbud Myntri Rangbah haba kren bad ki lad pathai khubor dang shen.
Shuh shuh u la ïathuh ba ka sorkar ka la shimkhia bha ïa kane ka bynta ban peitngor bad shim ruh ki sienjam haba ka ïoh pdiang ïa kino kino ki jingtip.
Lah ban kdew hangne ba ka la don ka jingujor da ka ejahar ha Nonghyllam Police Station ha ka 28tarik Risaw kaba ong ba don uba ïoh ia katei ka shithi dawa pisa kaba kam ba kadei na ka GNLA nalor ka jingshah phone byrngem na u number bym ithuh.
Dang shen na ka liang u Superintendent of Police ka South West Khasi Hills District Bah B Jyrwa, u la ïathuh ba ka jingïoh ban kem ïa ki 5 ngut kiba la suba ba ki dei na ka Garo National Liberation Army Regroup (GNLA-R) ka dei lyngba uwei u nongkhaïi uba la da ka ujor ejahar ha Nonghyllam Police Station hadien ba u la ïoh ka shithi dawa pisa kumba 5 lak tam bad hadien kata u la shah byrngem ruh lyngba ka phun.
Ha kaba ïadei bad kane jingjia, ki pulit haduh mynta ki dang pynlong ïa ka jingtohkit ban pynthikna ba kine baroh ki dei ne em ki dkhot jong a GNLA-R.
